മലയാളികളുടെ ഇഷ്ടതാരമാണ് മഞ്ജു വാര്യർ. താരത്തിന്റെ ലുക്കും വേഷങ്ങളുമെല്ലാം സോഷ്യൽ മീഡിയയിൽ വൈറലാവാറുണ്ട്. അടുത്തിടെ സോഷ്യൽ മീഡിയയിൽ ഹിറ്റായത് വെള്ളനിറത്തിലുള്ള ഷര്‍ട്ടും ബ്ലാക്ക് സ്‌കേര്‍ട്ടും അണിഞ്ഞ താരത്തിന്റെ ലുക്കാണ്. ബാങ്സ് സ്റ്റൈലിലുള്ള താരത്തിന്റെ മുടിയും ശ്രദ്ധ നേടി. സ്ത്രീകളുടെ ആത്മവിശ്വാസം ഉയർത്തുന്നതാണ് ഈ ചിത്രം എന്നായിരുന്നു ഭൂരിഭാഗം പേരുടേയും വിലയിരുത്തൽ.
അതിന് പിന്നാലെ ഈ വേഷത്തെ കോപ്പി ചെയ്ത് നിരവധി പേർ പാവാടയും ഷർട്ടിലും ചിത്രങ്ങൾ പങ്കുവെച്ചിരുന്നു. ഇപ്പോൾ മഞ്ജുവിന്റേയും ആരാധകരുടേയും മനം കവരുകയാണ് ഒരു മുത്തശ്ശി. മഞ്ജുവിനെപ്പോലെ വെള്ള ഷർട്ടും പാവാടയും ധരിച്ച് നിൽക്കുന്ന മുത്തശ്ശിയുടെ ചിത്രമാണ് ഹിറ്റാകുന്നത്. വാക്കറിലാണ് നടക്കുന്നതെങ്കിൽ ആള് നല്ല ആത്മവിശ്വാസത്തിലാണ് മഞ്ജുവിനെ പോലെ പോസ് ചെയ്യുന്നത്. മഞ്ജു വാര്യർ തന്നെയാണ് ചിത്രം പങ്കുവെച്ചത്.
"ഇതിനുമപ്പുറം എന്ത് അംഗീകാരം ? ഒരുപാടൊരുപാടു സ്നേഹം ലക്ഷ്മി ആന്റീ," താരം കുറിച്ചു. തന്റെ വൈറൽ ചിത്രത്തിനൊപ്പം മുത്തശ്ശിയുടെ ചിത്രവും ചേർത്തുവെച്ചുകൊണ്ടാണ് പോസ്റ്റ്. ചതുര്‍മുഖം എന്ന സിനിമയുടെ വാര്‍ത്താസമ്മേളനവുമായി ബന്ധപ്പെട്ട് കൊച്ചിയില്‍ എത്തിയ താരത്തിന്റെ ചിത്രമാണ് ഹിറ്റായത്. എന്തായാലും മുത്തശ്ശിയുടെ ചിത്രങ്ങളും ആരാധകർ ഏറ്റെടുത്തുകഴിഞ്ഞു. മഞ്ജുവിനേക്കാള്‍ ആത്മവിശ്വാസം ഈ മുഖത്ത് കാണാമെന്ന് ആരാധകര്‍ കുറിക്കുന്നു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
