വിവാദങ്ങളിൽ നിറഞ്ഞു നിൽക്കുന്നതിനിടെ അച്ഛനും നടനുമായ സുകുമാരന്റെ പഴയകാല ചിത്രം പങ്കുവെച്ച് പൃഥ്വിരാജ്. മുണ്ടുമടക്കിക്കുത്തി കയ്യിൽ സിഗററ്റുമായി നിൽക്കുന്ന സുകുമാരനാണ് ചിത്രത്തിൽ. കൂടെ മോഹൻലാൽ, മണിരത്നം, ഛായാഗ്രാഹകൻ രവി.കെ ചന്ദ്രൻ എന്നിവരെയും കാണാം. 1984ല്‍ പുറത്തിറങ്ങിയ 'ഉണരൂ' എന്ന സിനിമയുടെ ലൊക്കേഷനിൽ നിന്നുള്ളതാണ് ചിത്രം.
ഛായാഗ്രഹകന്‍ രവി കെ ചന്ദ്രനാണ് പഴയ ചിത്രം സുകുമാരന് നൽകിയത്. അദ്ദേഹത്തിന് നന്ദിയും പൃഥ്വിരാജ് കുറിച്ചിട്ടുണ്ട്. കടുത്ത സൈബർ ആക്രമണം നടക്കുന്നതിനിടെ അച്ഛന്റെ ചിത്രം പങ്കുവെച്ചത് വിമർശകർക്കുള്ള മറുപടിയായിട്ടാണ് എന്നാണ് ആരാധകർ പറയുന്നത്. ലക്ഷദ്വീപിന് പിന്തുണ പ്രഖ്യാപിച്ചതിന് പിന്നാലെ രൂക്ഷമായ സൈബർ ആക്രമണമാണ് താരത്തിന് നേരെയുണ്ടാകുന്നത്. കൂടാതെ അച്ഛൻ സുകുമാരനെ ബന്ധപ്പെടുത്തിയും വിമർശനം ഉയർന്നിരുന്നു.
ലക്ഷദ്വീപിലെ പുതിയ നിയമപരിഷ്കാരങ്ങൾ അവിടത്തെ സംസ്കാരത്തെ അട്ടിമറിക്കുന്നതാണ് എന്നായിരുന്നു പൃഥ്വിരാജ് കുറിച്ചത്. ലക്ഷദ്വീപിനുവേണ്ടി ശബ്ദമുയർത്തിയവരിൽ മുന്നിലാണ് പൃഥ്വിരാജ്. തുടർന്ന് പൃഥ്വിരാജിനെ വിമർശിച്ചുകൊണ്ടുള്ള ഒരു ടെലിവിഷൻ ചാനലിന്റെ പ്രസ്താവന വിവാദമായിരുന്നു. ഷാഫി പറമ്പിൽ, വിടി ബൽറാം, മന്ത്രി സജി ചെറിയാൻ നടന്മാരായ അജു വര്‍ഗ്ഗീസ്, ആന്റണി വര്‍ഗ്ഗീസ് സംവിധായകരായ മിഥുന്‍ മാനുവല്‍ തോമസ്, ജൂഡ് ആന്റണി അടക്കമുള്ള പ്രമുഖരും നേരത്തെ പൃഥ്വിരാജിന് പിന്തുണയുമായി രംഗത്തെത്തി.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
