ന്യൂഡല്‍ഹി: സൈനികരുടെ മനോവീര്യം തകര്‍ക്കുന്ന തരത്തിലുള്ള ഒരു നടപടിയും ഉണ്ടാവാന്‍ പാടില്ലെന്ന് പ്രധാനമന്ത്രി നരേന്ദ്രമോദി. രാജ്യത്തിനു സൈന്യത്തില്‍ പൂര്‍ണ വിശ്വാസമുണ്ടെന്ന് മോദി പറഞ്ഞു. ബിജെപി പ്രവര്‍ത്തകരുമായുള്ള വിഡിയോ കോണ്‍ഫറന്‍സില്‍ സംസാരിക്കുകയായിരുന്നു പ്രധാനമന്ത്രി.
ശത്രുക്കള്‍ ഇന്ത്യയെ അസ്ഥിരപ്പെടുത്താന്‍ ശ്രമിക്കുകയാണെന്ന് പ്രധാനമന്ത്രി പറഞ്ഞു. ഭീകര ആക്രമണങ്ങള്‍ നടത്തി ഇന്ത്യയുടെ വളര്‍ച്ച തടയാനാണ് അവര്‍ ശ്രമിക്കുന്നത്. ഇതിനെതിരെ രാജ്യം പാറപോലെ ഒരുമിച്ചു നില്‍ക്കും. ഇന്ത്യ ഒന്നായി ജീവിക്കുകയും വളരുകയും പോരാടുകയും വിജയിക്കുകയും ചെയ്യുമെന്ന് പ്രധാനമന്ത്രി പറഞ്ഞു.
രാജ്യത്തെ സംരക്ഷിച്ചുനിര്‍ത്തുന്ന എല്ലാവരോടും ഇന്ത്യയ്ക്കു നന്ദിയുണ്ട്. അവര്‍ അവിടെയുള്ളതുകൊണ്ടാണ് രാജ്യത്തിന് വികസനത്തിന്റെ പുതിയ തലങ്ങളില്‍ എത്താന്‍ കഴിയുന്നത്.
2014ലെ ജനവിധി ജനങ്ങളുടെ ആവശ്യങ്ങള്‍ നിറവേറ്റാനായിരുന്നെങ്കില്‍ 2019ലേത് അവരുടെ അഭിലാഷങ്ങള്‍ പൂര്‍ത്തീകരിക്കാനായിരിക്കുമെന്ന് മോദി അഭിപ്രായപ്പെട്ടു.
രാജ്യത്തെ 15000 കേന്ദ്രങ്ങളില്‍നിന്നുള്ള ഒരു കോടി ബിജെപി പ്രവര്‍ത്തകരെയാണ് വിഡിയോ കോണ്‍ഫറന്‍സിലൂടെ മോദി അഭിസംബോധന ചെയ്തത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
