വാരാണസി: പ്രധാനമന്ത്രി നരേന്ദ്രമോദിയുടെ മണ്ഡലമായ വാരാണസിയിലെ പ്രമുഖ സര്‍വകലാശാല തെരഞ്ഞെടുപ്പില്‍ എബിവിപിക്ക് കനത്ത തിരിച്ചടി. സമ്പൂര്‍ണാനന്ദ സംസ്‌കൃത വിശ്വവിദ്യാലയത്തില്‍ മത്സരിച്ച എല്ലാ സീറ്റിലും എബിവിപി സ്ഥാനാര്‍ഥികള്‍ പരാജയപ്പെട്ടു. എന്‍എസ്‌യുഐക്കാണ് വിജയം. പ്രധാനപ്പെട്ട നാല് സീറ്റിലും വന്‍ഭൂരിപക്ഷത്തിലാണ് കോണ്‍ഗ്രസിന്റെ വിദ്യാര്‍ഥി സംഘടന ജയിച്ചത്.
എബിവിപിയിലെ ഹര്‍ഷീത് പാണ്ഡയെ തോല്‍പ്പിച്ച് എന്‍എസ് യുഐ സ്ഥാനാര്‍ഥിയായ ശിവം ശുക്ല പ്രസിഡന്റായി തെരഞ്ഞെടുക്കപ്പെട്ടു. ചന്ദന്‍ കുമാര്‍ മിശ്ര വൈസ് പ്രസിഡന്റായും അവിനാഷ് പാണ്ഡെ ജനറല്‍ സെക്രട്ടറിയായും തെരഞ്ഞടുക്കപ്പെട്ടു. ലൈബ്രേറിയന്‍ പോസ്റ്റിലേക്ക് രജനികാന്ത ദുബെയും തെരഞ്ഞടുക്കപ്പെട്ടു.
സംഘര്‍ഷ സാധ്യത കണക്കിലെടുത്ത് വിജയാഹ്ലാദ റാലി ഒഴിവാക്കണമെന്ന് വൈസ് ചാന്‍സല്‍ വിദ്യാര്‍ഥികളോട് അഭ്യര്‍ത്ഥിച്ചു. വിജയിച്ച വിദ്യാര്‍ഥികള്‍ക്ക് വീട്ടിലേക്കുള്ള വഴിയിലും പൊലീസ് സംരക്ഷണം നല്‍കി. കഴിഞ്ഞ വര്‍ഷം നടന്ന തെരഞ്ഞടുപ്പില്‍ ഒരുസീറ്റില്‍ എബിവിപി സ്ഥാനാര്‍ത്ഥി വിജയിച്ചിരുന്നു. എന്നാല്‍ ഇത്തവണ ഒരു സീറ്റിലും ജയിക്കാത്തത് വലിയ തിരിച്ചടിയായി.
50.82 ശതമാനം വിദ്യാര്‍ഥികള്‍ മാത്രമാണ് തെരഞ്ഞെടുപ്പില്‍ വോട്ട് ചെയ്തത്. 1950 കുട്ടികളാണ് ഇവിടെ പഠിക്കുന്നത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
