ബംഗളൂരു: കര്ണാടകയില് ഭാര്യയുടെയും മകളുടെയും നേര്ക്ക് തിളച്ച എണ്ണ എറിഞ്ഞ് 38കാരന്. അമ്മയുടെയും മകളുടെയും കരച്ചില് കേട്ട് നാട്ടുകാര് ഓടിക്കൂടിയത് രക്ഷയായി. നാട്ടുകാര് വരുന്നത് കണ്ട് കൂടുതല് ആക്രമണത്തിന് മുതിരാതെ ഭര്ത്താവ് സ്ഥലത്ത് നിന്ന് കടന്നുകളഞ്ഞു.
കഴിഞ്ഞദിവസം തെക്കുകിഴക്കന് ബംഗളൂരുവിലാണ് സംഭവം. തോമസാണ് ഭാര്യയെയും മകളെയും ആക്രമിച്ചത്. വെളളം ചൂടാക്കാന് അടുക്കളയില് പോകുന്നു എന്നാണ് തോമസ് ഭാര്യയോട് പറഞ്ഞതെന്ന് പൊലീസ് പറയുന്നു. വെള്ളം ചൂടാക്കുന്നതിന് പകരം എണ്ണ ചൂടാക്കാന് തുടങ്ങി.
തുടര്ന്ന് മരകഷ്ണം എടുത്തു കൊണ്ടുവന്ന് കസേരയില് ഇരിക്കുകയായിരുന്ന ഭാര്യയുടെ തലയ്ക്ക് അടിച്ചു. അടിയുടെ ആഘാതത്തില് ഭാര്യ അബോധാവസ്ഥയിലായി. ഉടനെ തന്നെ അടുക്കളയില് പോയി തിളച്ച എണ്ണയുമായി വന്ന് ഭാര്യയുടെ ദേഹത്ത് ഒഴിച്ചു എന്നാണ് പരാതിയില് പറയുന്നത്. ഭാര്യയെ കൊല്ലുക എന്ന ലക്ഷ്യത്തോടെയാണ് ഇത് ചെയ്തതെന്ന് പൊലീസ് പറയുന്നു.
ഈസമയത്ത് ഉറക്കത്തിലായിരുന്ന 13 വയസുള്ള ഇവരുടെ മകള്, ശബ്ദം കേട്ട് ഓടിയെത്തി. അമ്മയെ ആക്രമിക്കുന്നത് കണ്ട പെണ്കുട്ടി രക്ഷിക്കാന് ചെന്നു. ഇതില് കുപിതനായ തോമസ് പെണ്കുട്ടിയുടെ കൈയില് തിളച്ച എണ്ണ ഒഴിച്ചു എന്നും പരാതിയില് പറയുന്നു.ഭാര്യയെ കൊല്ലുന്നത് തടയാന് ശ്രമിക്കരുത് എന്ന് പറഞ്ഞുകൊണ്ടാണ് മകളെയും ഉപദ്രവിച്ചതെന്നും പൊലീസ് പറയുന്നു. ശബ്ദം കേട്ട് നാട്ടുകാര് ഓടിയെത്തിയത് കൊണ്ട് യുവതിയുടെ ജീവന് രക്ഷിക്കാനായി എന്നാണ് റിപ്പോര്ട്ടുകള്.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ