ന്യൂഡല്‍ഹി: നിയമസഭ ഉപതെരഞ്ഞെടുപ്പ് പശ്ചാത്തലത്തില്‍, സിപിഎം ബിജെപിയുമായി വോട്ടുകച്ചവടം നടത്തുകയാണെന്ന കെപിസിസി പ്രസിഡന്റ് മുല്ലപ്പളളി രാമചന്ദ്രന്റെ ആരോപണത്തിന് മുഖ്യമന്ത്രി പിണറായി വിജയന്റെ മറുപടി. കുറച്ചു വോട്ടിനും നാലുസീറ്റിനും വേണ്ടി രാഷ്ട്രീയ ചെറ്റത്തരം കാണിക്കുന്നവരല്ല സിപിഎമ്മെന്ന് പിണറായി വിജയന്‍ മാധ്യമങ്ങളോട് പറഞ്ഞു. തെളിവുകള്‍ ഹാജരാക്കാന്‍ മുല്ലപ്പളളിയെ മുഖ്യമന്ത്രി വെല്ലുവിളിച്ചു.
ഞങ്ങളെ കുറിച്ച് ജനങ്ങള്‍ക്ക് അറിയാം.കുറച്ച് വോട്ടിനും നാലുസീറ്റിനും വേണ്ടി രാഷ്ട്രീയ ചെറ്റത്തരം കാണിക്കുന്നവരല്ല ഞങ്ങള്‍. അതാണ് ഞങ്ങളുടെ കരുത്ത്. ആ ശക്തിയാണ് ജനങ്ങള്‍ കാണുന്നത്. ശരിയായ ഉദ്ദേശ്യത്തോടെയാണ് മുല്ലപ്പളളി വെല്ലുവിളിക്കുന്നതെങ്കില്‍ അത് എല്ലാ അര്‍ത്ഥത്തിലും സ്വീകരിക്കുന്നു. ഇതുസംബന്ധിച്ച് എന്തുതെളിവാണ് അദ്ദേഹത്തിന്റെ കയ്യില്‍ ഉളളതെന്നും പിണറായി ചോദിച്ചു.
തെളിവുകള്‍ ഉണ്ടെങ്കില്‍ അത് മുന്നോട്ടുവെയ്ക്കാം. ഇത്തരം പൊയ്‌വെടികള്‍ കൊണ്ടൊന്നും രക്ഷപ്പെടാന്‍ സാധിക്കില്ലെന്നും മുഖ്യമന്ത്രി പറഞ്ഞു. കഴിഞ്ഞദിവസമാണ് സിപിഎം ബിജെപിയുമായി വോട്ടുകച്ചവടം നടത്തുകയാണെന്ന് മുല്ലപ്പളളി ആരോപണം ഉന്നയിച്ചത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
