പാലക്കാട്:സിപിഎം ഏരിയാ കമ്മിറ്റി ഓഫിസില് പീഡനത്തിനിരയായെന്ന് പരാതി നല്കിയ യുവതിയുടെ രഹസ്യമൊഴി രേഖപ്പെടുത്തി. പാലക്കാട് ജുഡീഷ്യല് ഒന്നാം ക്ലാസ് മജിസ്ട്രേറ്റാണ് യുവതി ചികിത്സയിലുള്ള ആശുപത്രിയിലെത്തി മൊഴിയെടുത്തത്. കുടിക്കാന് പാനീയം നല്കി മയക്കിയശേഷം പീഡിപ്പിച്ചെന്ന നേരത്തേ നല്കിയ മൊഴി യുവതി ആവര്ത്തിച്ചെന്നാണു സൂചന. അങ്ങനെയെങ്കില് അറസ്റ്റ് ഉടനുണ്ടായേക്കും.
2018 ജൂണില് സിപിഎം ചെര്പ്പുളശേരി ഏരിയാ കമ്മിറ്റി ഓഫിസില്വച്ചു പീഡനത്തിനിരയായെന്നാണ് യുവതിയുടെ ആരോപണം. ആരോപണ വിധേയനായ ചെര്പ്പുളശേരി സ്വദേശിയായ പുത്താനാലയ്ക്കല് തട്ടാരുതൊടിയില് പി.പ്രകാശനെതിരെ പൊലീസ് കേസെടുത്തിട്ടുണ്ട്. രണ്ടു മൊഴികളും തമ്മില് മാറ്റമില്ലെങ്കില് പ്രകാശന്റെ അറസ്റ്റ് ഉടനുണ്ടാകും. ചെര്പ്പുളശേരി ഏരിയാ കമ്മിറ്റി ഓഫിസിലെ ഡിവൈഎഫ്ഐയുടെ മുറിയില് വച്ചു കുടിക്കാന് പാനീയം നല്കി മയക്കിയശേഷം പീഡിപ്പിച്ചെന്നാണു യുവതി പൊലീസിനു നല്കിയ ആദ്യ മൊഴി.
പരാതിക്കാരിയും ആരോപണ വിധേയനും പാര്ട്ടിക്കാരല്ലെന്നാണ് സിപിഎം വിശദീകരണം. യുവതിയുടെ മൊഴി പ്രകാരം വസ്തുതാ പരിശോധന നടത്തി തെളിവെടുപ്പ് ഉള്പ്പെടെയുള്ള നടപടികളിലേക്കു കടക്കാനാണ് പൊലീസ് തീരുമാനം. യുവതിയുടെ മൊഴിയുടെ അടിസ്ഥാനത്തില് പ്രകാശനെതിരെ പൊലീസ് കഴിഞ്ഞ ദിവസം കേസെടുത്തിരുന്നു. ഗര്ഭിണിയായ യുവതി പ്രസവശേഷം കുഞ്ഞിനെ ഉപേക്ഷിച്ച സംഭവത്തില് മങ്കര പൊലീസ് കേസെടുത്ത് അന്വേഷണം നടത്തിയപ്പോഴാണു പീഡനവിവരം പുറത്തായത്.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ