തൃശൂർ; നിയന്ത്രണം വിട്ട ബൈക്ക് റോഡരികിൽ താഴ്ന്നുകിടന്ന കേബിളിൽ കുരുങ്ങി മറിഞ്ഞ് യുവാവ് മരിച്ചു. കോട്ടയം അമലഗിരി മണ്ണുശേരിയിൽ ജോണിയുടെ മകൻ എം.ആർ. അഭിജിത്താണ് (21) മരിച്ചത്. ഇന്നലെ പുലർച്ചെ ചൂണ്ടൽ – കുറ്റിപ്പുറം സംസ്ഥാന പാതയിൽ കടവല്ലൂർ വട്ടമാവിനു സമീപത്തായിരുന്നു അപകടം. ഒപ്പമുണ്ടായിരുന്ന കോട്ടയം വിഷ്ണുവിലാസം രാജേഷിന്റെ മകൻ വൈഷ്ണവിന് (22) നിസ്സാര പരുക്കേറ്റു.
സുള്ള്യയിൽ വിനോദയാത്ര കഴിഞ്ഞു മടങ്ങുകയായിരുന്നു ഇരുവരും. നിയന്ത്രണം വിട്ടു റോഡിൽ നിന്നു തെന്നിമാറിയ ബൈക്ക് സമീപത്തെ പോസ്റ്റിൽ താഴ്ന്നുകിടന്ന ഫൈബർ കേബിളിൽ കുരുങ്ങി മറിയുകയായിരുന്നു. അഭിജിത്തിന്റെ കഴുത്തിലും ചുറ്റിയ നിലയിലായിരുന്നു കേബിൾ.
വണ്ടിയോടിക്കുന്നതിനിടെ ഉറങ്ങിപ്പോയതാകാം അപകടത്തിനു കാരണമായതെന്നു സംശയിക്കുന്നു. അഭിജിത്തിനെ നാട്ടുകാർ ചേർന്നു സമീപത്തെ ആശുപത്രിയിൽ എത്തിച്ചെങ്കിലും രക്ഷിക്കാനായില്ല.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ