പത്തനംതിട്ട: ടിവി നന്നാക്കാനെന്ന വ്യാജേന വീടിനുള്ളില്‍ കടന്ന യുവാവ് വീട്ടമ്മയുടെ സ്വര്‍ണ മാല പൊട്ടിച്ചെടുത്തു കടന്നു. തടയാനുള്ള ശ്രമത്തില്‍, 4 പവന്‍ തൂക്കമുള്ള മാലയുടെ പകുതി തിരികെ കിട്ടി. പന്തളം മെഡിക്കല്‍ മിഷന്‍ ജംക്ഷനു സമീപം ലക്ഷ്മി ഭവനില്‍ പൊന്നമ്മയുടെ (87) മാലയാണ് മോഷ്ടാവ് അപഹരിച്ചത്.
ഇന്നലെ രാവിലെ എട്ടരയോടെയായിരുന്നു സംഭവം. ഇവര്‍ക്കൊപ്പം താമസിച്ചിരുന്ന മകള്‍ രാജമ്മ, ചികിത്സ സംബന്ധമായി കോട്ടയം മെഡിക്കല്‍ കോളജിലേക്ക് പോയിരുന്നു.കോളിങ് ബെല്‍ കേട്ടാണ് പൊന്നമ്മ കതക് തുറന്നത്. ഒന്നും മിണ്ടാതെ അകത്തേക്ക് കടന്ന യുവാവ് ടിവിയിലും അത് ഘടിപ്പിച്ചിരുന്ന പ്ലഗിലും പരിശോധിക്കുന്നതുപോലെ ഭാവിച്ചു. ടിവി നന്നാക്കാന്‍ നേരത്തെ ആളിനെ അന്വേഷിച്ചിരുന്നതിനാല്‍, അതിനെത്തിയതാവുമെന്നു കരുതി. ഇതിനിടെ യുവാവ് പെട്ടെന്ന് തിരിഞ്ഞ് പൊന്നമ്മയെ തള്ളി വീഴ്ത്തുകയും മാല പൊട്ടിക്കുകയുമായിരുന്നു.
ഉടന്‍ തന്നെ വീടിനു പുറത്തിറങ്ങിയ അവര്‍ അയല്‍വാസികളെ വിളിച്ചു വരുത്തിയെങ്കിലും യുവാവ് ഇരുചക്രവാഹനത്തില്‍ രക്ഷപ്പെട്ടു. യുവാവ് മുഖാവരണം ധരിച്ചിരുന്നതിനാല്‍ മുഖം വ്യക്തമായില്ലെന്ന് പൊന്നമ്മ പറഞ്ഞു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
