ആരോഗ്യമന്ത്രി കോവിഡ് വാക്സിന് സ്വീകരിച്ചു; നാലുലക്ഷത്തിലധികം പേര്‍ കുത്തിവെയ്പ് എടുത്തതായി കെ കെ ശൈലജ
By സമകാലിക മലയാളം ഡെസ്‌ക്‌ | Published: 02nd March 2021 03:07 PM |
Last Updated: 02nd March 2021 03:07 PM | A+A A- |
ആരോഗ്യമന്ത്രി വാക്സിന് സ്വീകരിക്കുന്നു
തിരുവനന്തപുരം: ആരോഗ്യമന്ത്രി കെ കെ ശൈലജ കോവിഡ് വാക്സിന് സ്വീകരിച്ചു. തിരുവനന്തപുരം മെഡിക്കല്‍ കോളജിലെ കോവിഡ് വാക്സിനേഷന് കേന്ദ്രത്തിലാണ് ആരോഗ്യമന്ത്രി വാക്സിന് സ്വീകരിക്കാന്‍ എത്തിയത്. ഇതുവരെ നാല് ലക്ഷത്തിലധികം പേര്‍ വാക്സിന് എടുത്ത് കഴിഞ്ഞതായും ആര്‍ക്കും തന്നെ ഗുരുതര പാര്‍ശ്വഫലങ്ങള്‍ ഇല്ലെന്നും കെ കെ ശൈലജ അറിയിച്ചു.
നേരത്തെ മന്ത്രി കടന്നപ്പള്ളി രാമചന്ദ്രനാണ് കോവിഡ് വാക്സിന് സ്വീകരിച്ച് മന്ത്രിമാര്‍ക്കിടയിലുള്ള വാക്സിനേഷന് തുടക്കമിട്ടത്. ഇന്നലെയാണ് രണ്ടാം ഘട്ടം വാക്സിനേഷന് തുടങ്ങിയത്. 60 വയസിന് മുകളിലുള്ളവര്‍ക്കും 45നും 59നും ഇടയില്‍ പ്രായമുള്ള ഗുരുതര ആരോഗ്യപ്രശ്‌നങ്ങള്‍ ഉള്ളവര്‍ക്കുമാണ് രണ്ടാം ഘട്ട വാക്സിനേഷന്. ആദ്യ ഘട്ടത്തില്‍ കോവിഡ് മുന്നണിപ്പോരാളികള്‍ക്കാണ് കുത്തിവെയ്പ് നല്‍കിയത്.
വിവിധ ജില്ലകളില്‍ ആയിരത്തിലധികം സെന്ററുകള്‍ വാക്സിനെടുക്കാന്‍ തയ്യാറാക്കിയിട്ടുണ്ടെന്ന് ആരോഗ്യമന്ത്രി പറഞ്ഞു. ഇതുകൂടാതെ പരീക്ഷണാടിസ്ഥാനത്തില്‍ തിരുവനന്തപുരത്ത് മാസ് വാക്സിനേഷന് കേന്ദ്രം സംഘടിപ്പിച്ചിരുന്നു. അതുപോലെ മാസ് വാക്സിനേഷന് കേന്ദ്രങ്ങളുടെ സാധ്യതയും നോക്കുന്നതാണ്. ഇതോടെ കൂടുതല്‍ ആളുകള്‍ക്ക് ഒരേസമയം വാക്സിന് നല്‍കാന്‍ സാധിക്കും. മുന്‍ഗണനാക്രമം അനുസരിച്ച് എല്ലാവരും വാക്സിന് എടുക്കേണ്ടതാണ്. പോര്‍ട്ടലില്‍ രജിസ്റ്റര് ചെയ്തുവേണം വാക്സിന് എടുക്കാന്‍.
വാക്സിന്റെ ആദ്യ ഡോസ് എടുത്ത് കഴിഞ്ഞാല്‍ പ്രതിരോധമായെന്ന് കരുതരുത്. 28 ദിവസം കഴിഞ്ഞ് രണ്ടാമത്തെ ഡോസ് എടുക്കണം. അതുകഴിഞ്ഞ് 14 ദിവസം കഴിഞ്ഞേ പ്രതിരോധശേഷി കൈവരികയുള്ളൂ. അത്രയും ദിവസം ജാഗ്രത തുടരേണ്ടതാണെന്നും മന്ത്രി പറഞ്ഞു.
