തിരുവനന്തപുരം: കനത്ത മഴയെത്തുടര്ന്ന് ഈ മാസം പതിനെട്ടിനു മാറ്റിവച്ച പ്ലസ് വണ് പരീക്ഷ 26ന് നടത്തും. സമയത്തില് മാറ്റമില്ലെന്ന് അധികൃതര് അറിയിച്ചു.
സംസ്ഥാനത്ത് ഏതാനും ദിവസം കൂടി മഴ തുടരുമെന്നാണ് കാലാവസ്ഥാ വകുപ്പിന്റെ മുന്നറിയിപ്പ്. അടുത്തയാഴ്ച തീവ്ര മഴ ഉണ്ടാവില്ലെന്നാണ് പ്രതീക്ഷിക്കുന്നത്. കന്യാകുമാരിക്കു സമീപം രൂപപ്പെട്ട ചക്രവാതച്ചുഴി രണ്ട് ദിവസം കൂടി തുടരുന്നതുമൂലം മലയോരത്തു ശക്തമായ മഴയുണ്ടാകും.
ആലപ്പുഴ ഒഴികെ വയനാട് മുതല് പത്തനംതിട്ട വരെ നാളെയും യെലോ അലര്!ട്ടുണ്ട്. ഇന്നലെ രാവിലെ കാര്യമായ മഴയുണ്ടായില്ലെങ്കിലും പിന്നീട് ഇടുക്കി ഉള്പ്പെടെ പലയിടങ്ങളിലും മഴ ശക്തമായി.
ഇടുക്കി ഡാമിന്റെ ഷട്ടറുകള് അടച്ചു
ജലനിരപ്പ് ഉയര്ന്നതിനെത്തുടര്ന്നഇടുക്കി ഡാമില് റെഡ് അലര്ട്ട് പ്രഖ്യാപിച്ചെങ്കിലും പിന്വലിച്ചു. ചെറുതോണി അണക്കെട്ടില് ചൊവ്വാഴ്ച ഷട്ടര് തുറക്കുമ്പോള് 2398.08 അടിയായിരുന്ന ജലനിരപ്പ് ഇന്നലെ രാത്രി പത്തിന് 2398.30 അടിയായി വര്ധിച്ചു. തുടര്ന്നാണ് റെഡ് അലര്ട്ട് പ്രഖ്യാപിച്ചത്. നീരൊഴുക്കു കുറഞ്ഞതോടെ ഡാമിന്റെ രണ്ടു ഷട്ടറുകള് അടച്ചു.
മുല്ലപ്പെരിയാറില് ജലനിരപ്പ് 135.30 അടി
മുല്ലപ്പെരിയാര് ജലനിരപ്പും 135.30 അടിയായി കൂടി. 136 അടി കവിഞ്ഞാല് സ്പില്വേയിലെ ഷട്ടറുകളിലേക്കു വെള്ളമെത്തും. പിന്നീട് എപ്പോള് വേണമെങ്കിലും ഷട്ടറുകള് ഉയര്ത്തി വെള്ളം പെരിയാറിലേക്ക് ഒഴുക്കാം. കക്കി, ഷോളയാര്, പൊന്മുടി, പെരിങ്ങല്ക്കുത്ത്, കുണ്ടള, കല്ലാര്കുട്ടി, ഇരട്ടയാര്, ലോവര് പെരിയാര്, പീച്ചി അണക്കെട്ടുകളിലും റെഡ് അലര്ട്ടാണ്. കൂടാതെ മാട്ടുപ്പെട്ടി, ചിമ്മിണി, ചുള്ളിയാര്, മലമ്പുഴ, മംഗലം, മീങ്കര അണക്കെട്ടുകളില് ഓറഞ്ച് അലര്ട്ടുമുണ്ട്.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ