ആലപ്പുഴ: ഏഴുവയസ്സുള്ള മകന് ഐസ്ക്രീമില് വിഷം കലര്ത്തി നല്കിയ ശേഷം അമ്മ തൂങ്ങിമരിച്ചു. അമ്പലപ്പുഴ വടക്ക് ഗ്രാമപ്പഞ്ചായത്ത് നാലാം വാര്ഡില് വണ്ടാനം പള്ളിവെളിവീട്ടില് മുജീബിന്റെ ഭാര്യ റഹ്മത്ത് (39) ആണ് മരിച്ചത്. ചൊവ്വാഴ്ച വൈകീട്ടായിരുന്നു സംഭവം.
മകന് മുഫാസ് ആലപ്പുഴ മെഡിക്കല് കോളേജ് ആശുപത്രിയില് തീവ്രപരിചരണവിഭാഗത്തില് ചികിൽസയിലാണ്. ഹോട്ടല് തൊഴിലാളിയായ ഭര്ത്താവ് വീട്ടിലില്ലാതിരുന്ന സമയത്താണ് റഹ്മത്ത് ഇളയമകന് ഐസ്ക്രീമില് വിഷം കലര്ത്തി നല്കിയത്. മൂത്തമകള് വിളിച്ചതിനെത്തുടര്ന്ന് എത്തിയ മുജീബ് പെണ്മക്കള്ക്കൊപ്പം കുട്ടിയെ പുന്നപ്രയിലെ സ്വകാര്യ ആശുപത്രിയിലെത്തിച്ചു.
പിന്നീട്, മെഡിക്കല് കോളേജ് ആശുപത്രിലേക്കു മാറ്റി. ആശുപത്രിയില് വെച്ചാണ് മാതാവും വിഷം കഴിച്ച വിവരം കുട്ടി പറഞ്ഞത്. മുജീബ് ഉടന് തന്നെ ഓട്ടോറിക്ഷയില് വീട്ടിലെത്തി. അടച്ചിട്ട വാതില് തുറന്ന് അകത്തുകടന്നപ്പോള് കിടപ്പുമുറിയില് റഹ്മത്ത് തൂങ്ങിയ നിലയിലായിരുന്നു. ഉടൻ മെഡിക്കല് കോളേജ് ആശുപത്രിയിലെത്തിച്ചെങ്കിലും രക്ഷിക്കാനായില്ല.
റഹ്മത്ത് ആത്മഹത്യാപ്രവണതയുള്ളയാളാണെന്ന് പോലീസ് പറയുന്നു. എട്ടുകൊല്ലമായി മാനസിക വിഭ്രാന്തിക്കു ജില്ലാ ആശുപത്രിയിലെ ചികിത്സയിലാണ്. രണ്ടാഴ്ച മുന്പ് ഇവര് വീടിനുള്ളില് തൂങ്ങി മരിക്കാന് ശ്രമിച്ചെങ്കിലും മൂത്തമകള് കണ്ടു കെട്ടഴിച്ച് ആശുപത്രിയിൽ എത്തിക്കുകയായിരുന്നുവെന്നും പോലീസ് അറിയിച്ചു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ