കൊച്ചി: ആലുവയില് നിയമ വിദ്യാര്ത്ഥിനി മോഫിയ പര്വീണ് ആത്മഹത്യ ചെയ്ത കേസില് ഭര്ത്താവും ഒന്നാം പ്രതിയുമായ സുഹൈലിന് ഹൈകോടതി ജാമ്യം അനവദിച്ചു. കേസില് രണ്ടും മൂന്നും പ്രതികളായ സുഹൈലിന്റെ മാതാപിതാക്കള്ക്ക് നേരത്തെ ജാമ്യം ലഭിച്ചിരുന്നു. പ്രായം പരിഗണിച്ചായിരുന്നു അന്ന് മാതാപിതാക്കള്ക്ക് ജാമ്യം അനുവദിച്ചത്.
സ്ത്രീധന പീഡനത്തെ തുടര്ന്നാണ് കഴിഞ്ഞ നവംബറില് ആലുവ എടയപ്പുറം സ്വദേശിനി മൊഫിയ പര്വീണ് (21) ആത്മഹത്യ ചെയ്തത്. ഭര്തൃവീട്ടുകാര്ക്കെതിരെ പോലീസില് പരാതി നല്കിയതിന് പിന്നാലെയാണ് യുവതി തൂങ്ങി മരിച്ചത്. ഭര്തൃവീട്ടുകാര്ക്കും സിഐ സിഎല് സുധീറിനുമെമെതിരെ നടപടിയെടുക്കണമെന്ന് മോഫിയ ആത്മഹത്യാ കുറിപ്പില് ആവശ്യപ്പെട്ടിരുന്നു.
തൊടുപുഴ അല് അസ്ഹര് ലോ കോളജിലെ മൂന്നാം വര്ഷ വിദ്യാര്ത്ഥിനിയായിരുന്നു മോഫിയ. വിവാഹത്തിനു ശേഷം മോഫിയയെ ഭര്ത്താവും വീട്ടുകാരും സ്ത്രീധനത്തിന്റെ പേരില് പീഡിപ്പിച്ചിരുന്നു.
ആലുവ ഡിവൈഎസ്പിക്ക് പെണ്കുട്ടിയുടെ കുടുംബം പരാതി നല്കി. ഇതിന് പിന്നാലെ പെണ്കുട്ടിയുടെയും ഭര്ത്താവിന്റെയും വീട്ടുകാരെ മധ്യസ്ഥ ചര്ച്ചയ്ക്ക് വിളിച്ചിരുന്നു. എന്നാല് സിഐ വളരെ മോശമായാണ് സംസാരിച്ചതെന്ന് ബന്ധുക്കളുടെ ആരോപണം. തുടര്ന്നാണ് മോഫിയ ആത്മഹത്യ ചെയ്തത്. സംഭവത്തിനു പിന്നാലെ പ്രശ്നത്തില് ഇടപെടുന്നതില് വീഴ്ച വരുത്തിയ ആലുവ സിഐക്കെതിരെ ഉദ്യോഗസ്ഥ തലത്തില് നടപടിയെടുത്തിരുന്നു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ