കൊച്ചി: നടിയെ ആക്രമിച്ച കേസിലെ തുടരന്വേഷണം പൂര്ത്തിയാക്കാന് കൂടുതല് സമയം അനുവദിക്കണമെന്ന പ്രോസിക്യൂഷന്റെ ആവശ്യം കോടതി തള്ളി. ഒരു മാസത്തിനകം അന്വേഷണം പൂര്ത്തിയാക്കണമെന്ന് വിചാരണ കോടതി ഉത്തരവിട്ടു. മാര്ച്ച് ഒന്നിനകം അന്തിമ റിപ്പോര്ട്ട് നല്കണമെന്നും കോടതി വ്യക്തമാക്കി.
തുടരന്വേഷണം പൂര്ത്തിയാക്കാന് ആറുമാസം കൂടി സാവകാശം അനുവദിക്കണമെന്ന് ആവശ്യപ്പെട്ടാണ് പ്രോസിക്യൂഷന് കോടതിയെ സമീപിച്ചത്. ഈ ആവശ്യമാണ് കോടതി തള്ളിയത്. എന്നാല് ഒരുമാസത്തിനകം തുടന്വേഷണം പൂര്ത്തിയാക്കാനാവില്ലെന്ന് പ്രോസിക്യൂഷന് കോടതിയെ അറിയിച്ചു. വിചാരണ കോടതി തീരുമാനത്തിനെതിരെ അപ്പീല് നല്കുമെന്നും പ്രോസിക്യൂഷന് അറിയിച്ചു.
നടിയെ ആക്രമിച്ച സംഭവവുമായി ബന്ധപ്പെട്ട് സംവിധായകന് ബാലചന്ദ്രകുമാറിന്റെ വെളിപ്പെടുത്തലിന്റെ അടിസ്ഥാനത്തിലാണ്, കേസില് ക്രൈംബ്രാഞ്ച് തുടരന്വേഷണം ആരംഭിച്ചത്. കേസില് വിചാരണ നീട്ടിവെക്കണമെന്ന് ആവശ്യപ്പെട്ട് സര്ക്കാര് നല്കിയ അപ്പീല് സുപ്രീംകോടതി തള്ളിയിരുന്നു. സര്ക്കാരിന്റെ അപേക്ഷയില് വിചാരണ നീട്ടാനാവില്ലെന്നും വിചാരണ കോടതി ജഡ്ജി ആവശ്യപ്പെട്ടാല് തീരുമാനിക്കാമെന്നും ജസ്റ്റിസ് എ എം ഖാന്വില്ക്കര് അധ്യക്ഷനായ ബെഞ്ച് വ്യക്തമാക്കിയിരുന്നു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ