മാധുര്യത്തിലേക്ക്
കര്‍ക്കശമായി ആഴ്ന്ന
പല്ലുകളുടെ ഒരു കാലം.
ഓരോ കടിയിലും
ഉമിനീരില്‍
കാട്ടാനകള്‍ മദിച്ചു.
നീലയും കാപ്പിയും
ഞാനോ നീയോ എന്ന്
കലഹിക്കുന്ന കരിനാഗക്കട്ടിത്തോല്.
മോണ പൊട്ടിയ ചോരയുടെ
ചെറുചിത്രച്ചന്തം.
ചണ്ടി ചവച്ചുതള്ളുമ്പോള്‍
ത്രസിച്ചിരുന്ന
വേട്ടയാട് വിളയാട് ആനന്ദം.
കഴിച്ച കാലം മറന്നു.
ഒരുകണക്കിന്
നന്നായി
സകലതിനെയും കടിച്ചീമ്പി
കോള്‍ഗേറ്റിനൊപ്പിച്ചുള്ള
ഈ പതയലാണ് നല്ലത്.
പക്ഷേ,
കണ്ണാടിയിലെ ചണ്ടീ
എവിടെപ്പോയി
നിന്നിലെ
മ
ധു
ര
ങ്ങ
ള്‍
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
