സ്വിമ്മിങ് സ്യൂട്ട് ധരിച്ച് കടല്‍ത്തീരത്തിരിക്കുന്ന ഫോട്ടോ സമൂഹമാധ്യമങ്ങളില്‍ ഷെയര്‍ ചെയ്ത ബോളിവുഡ് താരത്തിനെതിരെ അധിക്ഷേപവുമായി മതഭ്രാന്തന്മാര്‍. റംസാന്‍ നാളുകളില്‍ സ്വിമ്മിങ് സ്യൂട്ട് ധരിച്ചിരിക്കുന്നത് മതത്തിന് എതിരാണെന്നാണ് ഇവര്‍ വാദിക്കുന്നത്.
തഗ്‌സ് ഓഫ് ഹിന്ദുസ്ഥാന്‍ എന്ന സിനിമയുടെ ഷൂട്ടിങ്ങിനിടെ സ്വിമ്മിങ് ഷൂട്ടില്‍ ഫോട്ടോയെടുത്ത ഫാത്തിമ സന ഷെയ്ക്കിനെതിരെയാണ് സമൂഹ മാധ്യമങ്ങളില്‍ ഒരുകൂട്ടം ആളുകള്‍ പ്രതിഷേധവുമായെത്തിയത്.
ഒരു യഥാര്‍ഥ മതവിശ്വാസി ഒരിക്കലും ഇങ്ങനെ ചെയ്യില്ലെന്നാണ് ദംഗല്‍ ഫെയിം സന ഷെയ്ക്കിനെതിരെ വിമര്‍ശനം ഉയരുന്നത്. എന്നാല്‍ താരത്തിന്റെ വസ്ത്ര സ്വാതന്ത്ര്യത്തെ വിമര്‍ശിക്കുന്നവരെ പരിഹസിച്ചും ഒരു കൂട്ടം രംഗത്തെത്തുന്നുണ്ട്.
തനിക്കെതിരെ ഉയരുന്ന വിമര്‍ശനങ്ങളോട് ഫാത്തിമ സന ഇതുവരെ പ്രതികരിച്ചിട്ടില്ല. ഇതിന് മുന്‍പ് ദംഗലില്‍ ഫാത്തിമയുടെ ചെറുപ്പകാലം ചെയ്ത സൈറ വാസിമിനെതിരേയും സമൂഹ മാധ്യമങ്ങളില്‍ വിമര്‍ശനം ഉയര്‍ന്നിരുന്നു. ജമ്മുകശ്മീര്‍ മുഖ്യമന്ത്രി മെഹ്ബൂബ മുഫ്തിയെ സന്ദര്‍ശിച്ചതിനായിരുന്നു സൈറയ്‌ക്കെതിരായ അധിക്ഷേപങ്ങള്‍.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ