ട്രോളന്മാരുടെ ഇഷ്ട കഥാപാത്രമാണ് സുരാജ് വെഞ്ഞാറമൂടിന്റെ ദശമൂലം ദാമു. വിഷയം എന്തുമായാലും ദശമൂലം ദാമുവിനെ എടുത്ത് ട്രോളുണ്ടാക്കിയില്ലെങ്കില്‍ സോഷ്യല്‍ മീഡിയയ്ക്ക് സമാധാനമുണ്ടാവില്ല. മമ്മൂട്ടി നായകനായെത്തിയ ചട്ടമ്പിനാട് പ്രേക്ഷകര്‍ മറന്നു തുടങ്ങി. എന്നാല്‍ അതിലെ കഥാപാത്രമായ ദാമു ഇപ്പോഴും ആരാധകരുടെ മനസില്‍ നിറഞ്ഞു നില്‍ക്കുകയാണ്.
ദശമൂലം ദാമു സിനിമയിലെ നായകനായാല്‍ എങ്ങനെ ആവുമെന്ന് ചിന്തിച്ചിട്ടുണ്ടോ? ട്രോളന്മാര്‍ അത് ചിന്തിച്ചു. പ്രാവര്‍ത്തികമാക്കുകയും ചെയ്തു. മോഹന്‍ലാലും സൂര്യയും ദുല്‍ഖര്‍ സല്‍മാനുമെല്ലാം അഭിനയിച്ച കഥാപാത്രങ്ങളായിട്ടാണ് ദശമൂലം ദാമു എത്തിയത്. ദശമൂലം നായകനായി എത്തിയതിനാല്‍ വീഡിയോകള്‍ സോഷ്യല്‍ മീഡിയയില്‍ വൈറലായി. ഇപ്പോള്‍ സുരാജ് വെഞ്ഞാറമൂട് തന്നെ ട്രോളന്മാര്‍ക്ക് നന്ദി അറിയിച്ചുകൊണ്ട് രംഗത്ത് എത്തിയിരിക്കുകയാണ്. 'ട്രോളന്മാരുടെ സമ്മാനം... ഒരുപാട് നന്ദി ഉണ്ട് ഈ കാണിക്കുന്ന സ്‌നേഹത്തിന്'എന്ന കുറിപ്പോടെ ദശമൂലത്തിന്റെ സൂപ്പര്‍ഹിറ്റ് വീഡിയോകള്‍ സോഷ്യല്‍ മീഡിയയില്‍ ഷെയര്‍ ചെയ്തിരിക്കുകയാണ് സുരാജ്.
മോഹന്‍ലാലിന്റെ സൂപ്പര്‍ഹിറ്റ് ചിത്രം നരസിംഹത്തിലാണ് ദശമൂലം നായകനായി എത്തിയത്. കൂടാതെ തമിഴ് നടന്‍ സൂര്യയുടെ ഏഴാം അറിവ്, ദുല്‍ഖര്‍ സല്‍മാന്റെ ഉസ്താദ് ഹോട്ടല്‍ എന്നിവയെല്ലാം ട്രോളന്മാര്‍ അഴിച്ച് പണിത് ദാമുവിന്റേതാക്കി.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ