ഹിന്ദിയില്‍ സൂപ്പര്‍ഹിറ്റായ ബിഗ് ബോസിന്റെ തമിഴ് പതിപ്പിനെതിരേ രൂക്ഷ വിമര്‍ശനവുമായി നടി റായ് ലക്ഷ്മി. കമല്‍ഹാസന്‍ അവതാരകനായെത്തുന്ന സൂപ്പര്‍ ഷോ എന്തിനാണ് തന്നെക്കുറിച്ച് തെറ്റായ വാര്‍ത്ത പ്രചരിപ്പിക്കുന്നത് എന്നാണ് നടി ചോദിക്കുന്നത്. ബിഗ് ബോസ് തമിഴിന്റെ രണ്ടാം സീസണില്‍ റായ് ലക്ഷ്മിയുണ്ടാകുമെന്ന് പ്രചാരണമുണ്ടായിരുന്നു. ഇതാണ് നടിയെ പ്രകോപിപ്പിച്ചത്.
എല്ലാ സീസണിലും എന്തിനാണ് എന്നെക്കുറിച്ച് ബിഗ് ബോസ് തമിഴ് തെറ്റായ വാര്‍ത്തകള്‍ പ്രചരിപ്പിക്കുന്നത് എന്നാണ് ട്വിറ്ററിലൂടെ താരം ചോദിച്ചത്. റായ് ലക്ഷ്മി മത്സരാര്‍ത്ഥിയായി എത്തും എന്ന പ്രചാരണമുണ്ടായതോടെ താരത്തിന് വിജയാശംസകള്‍ നേര്‍ന്ന് നിരവധി പേരാണ് ട്വീറ്റ് ചെയ്തത്. ഇതിന് മറുപടിയായിട്ടായിരുന്ന താരത്തിന്റെ പ്രതികരണം.
കമല്‍ഹാസന്‍ അവതാരകനായെത്തുന്ന ഷോയുടെ രണ്ടാം സീസണിന്റെ ടീസര്‍ കഴിഞ്ഞ ദിവസമാണ് പുറത്തുവിട്ടത്. കമല്‍ഹാസനാണ് രണ്ടാം ഭാഗത്തിന്റെ പ്രഖ്യാപനം നടത്തിയത്. ഹിന്ദിയില്‍ സല്‍മാന്‍ ഖാന്‍ ആരാധകനായി എത്തുന്ന പരിപാടിക്ക് വലിയ ജനപ്രീതിയാണുള്ളത്. മോഹന്‍ലാലിനെ അവതാരകനാക്കി മലയാളത്തിലും ബിഗ് ബോസ് പ്രഖ്യാപിച്ചിരിക്കുകയാണ്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ