നടനും അവതാരകനുമായ ആദില്‍ ഇബ്രാഹിമിന്റെ വിവാഹമായിരുന്നു ഇന്നലെ. തൃശൂര്‍ സ്വദേശിയായ നമിതയാണ് ആദിലിന്റെ വധു. സൂഹൃത്തുക്കളും ബന്ധുക്കളുമൊക്കെയായി അത്യാഢംഭരമായിരുന്നു ഇരുവരുടെയും വിവാഹം.
എന്നാല്‍ വിവാഹവാര്‍ത്ത പുറത്തുവന്നതിന് പിന്നാലെ ആദില്‍ അന്യമതസ്ഥയുമായി വിവാഹിതനായതിലുള്ള വിയോജിപ്പുമായി ചിലര്‍ രംഗത്തെത്തുകയായിരുന്നു. ആദില്‍ പങ്കുവച്ച വിവാഹചിത്രത്തിനും താരത്തിന്റെ പേഴ്‌സണല്‍ മെസേജിലുമെല്ലാം വിമര്‍ശന സന്ദേശങ്ങള്‍ എത്തി. ഇതുമായി ബന്ധപ്പെട്ടുള്ള താരത്തിന്റെ പ്രതികരണമാണ് ഇപ്പോള്‍ പുറത്തുവന്നിരിക്കുന്നത്.
തന്നെയും തന്റെ വീട്ടുകാരെയും ഭാര്യയെക്കുറിച്ചും വളരെ നെഗറ്റീവായ കമന്റുകള്‍ കാണാനിടയായെന്ന് പറഞ്ഞാണ് ആദില്‍ പോസ്റ്റ് തുടങ്ങിയിരിക്കുന്നത്. "ആദ്യം ഇത്തരം കമന്റുകളോട് പ്രതികരിക്കണ്ടെന്നാണ് കരുതിയത്. ഞാന്‍ ആരെ വിവാഹം ചെയ്യണം എന്നത് എന്റെ മാത്രം തീരുമാനമാണ്. ക്ഷമിക്കണം ഞാന്‍ ആളുകളെ മനുഷ്യരായി മാത്രമേ കാണാറുള്ളു. അതുകൊണ്ടുതന്നെ രണ്ടു മനുഷ്യന്മാര് തമ്മിലുള്ള വിവാഹമാണിത്. ഞാന്‍ ഒരു മുസ്ലീം ആയതുകൊണ്ട് ആരെങ്കിലും എന്നെ ഇഷ്ടപ്പെടണമെന്നോ ഫോളോ ചെയ്യണമെന്നോ എനിക്കില്ല. അതുകൊണ്ട് നിങ്ങള്‍ സത്യമുള്ള മനുഷ്യന്മാര് ആണെങ്കില്‍ മാത്രം എന്നെ തുടര്‍ന്നും ഫോളോ ചെയ്താല്‍ മതി."
ആദിലിന്റെ വിവാഹത്തിനെതിരെ രംഗത്തുവന്നുകൊണ്ട് തന്നെ അണ്‍ഫോളോ ചെയ്ത ഒരു പെണ്‍ക്കുട്ടി അയച്ച മെസേജ് പങ്കുവച്ചുകൊണ്ടായിരുന്നു താരത്തിന്റെ കുറിപ്പ്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ