ഹൈദരാബാദ്: സീരിയൽ നടി നാഗ ഝാൻസി (21) ജീവനൊടുക്കി. പവിത്ര ബന്ധം എന്ന തെലുങ്കു സീരിയലിലൂടെ പ്രശസ്തയായിരുന്നു നാഗ ഝാൻസി. ഹൈദരാബാദിലെ ശ്രീനഗർ കോളനിയിലെ വസതിയിലാണ് നാഗ ത്സാൻസി ജീവനൊടുക്കിയത്.
ഇന്നലെ രാത്രി ഒമ്പത് മണിയോടെയാണ് നടിയെ സീലിംഗ് ഫാനിൽ തൂങ്ങിയ നിലയിൽ കണ്ടെത്തിയത്. ഉടൻ തന്നെ സെക്കന്തരാബാദിലെ ഗാന്ധി ആശുപത്രിയിലേക്ക് കൊണ്ടുപോയി. എന്നാൽ ആശുപത്രിയിലെത്തുമ്പോഴേക്കും മരിച്ചതായാണ് റിപ്പോർട്ട്.
നടിയുടെ മുറിയിൽ നിന്നും ആത്മഹത്യ കുറിപ്പും മൊബൈൽ ഫോണും പൊലീസിന് ലഭിച്ചിട്ടുണ്ട്. എന്നാൽ കുറിപ്പിലെ വിശദാംശങ്ങൾ പൊലീസ് പുറത്തുവിട്ടിട്ടില്ല. പ്രണയനൈരാശ്യമാണ് ആത്തമഹത്യയ്ക്ക് കാരണമെന്ന് അഭ്യൂഹമുണ്ട്. നടി കുറച്ചുകാലമായി സൂരിയ എന്ന യുവാവുമായി പ്രണയത്തിലായിരുന്നു.
എന്നാൽ നടിയുടെ വീട്ടുകാർ ഈ ബന്ധത്തെ എതിർത്തിരുന്നു. ഇതേച്ചൊല്ലി കഴിഞ്ഞദിവസം നടിയും വീട്ടുകാരും തമ്മിൽ വഴക്കുണ്ടായിരുന്നതായും റിപ്പോർട്ടുകളുണ്ട്. ആന്ധ്രയിലെ കൃഷ്ണ ജില്ലയിലെ വഡാലി ഗ്രാമമാണ് നാഗ ഝാൻസിയുടെ സ്വദേശം.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ