സമൂഹമാധ്യമങ്ങളില്‍ സാന്നിധ്യമറിയിക്കുന്ന താരങ്ങളില്‍ ശ്രദ്ധേയയാണ് ടെലിവിഷന്‍ അവതാരകയും നടിയുമായ ആര്യ. ആരാധകരുമായി നിരന്തരം വിശേഷങ്ങള്‍ പങ്കുവയ്ക്കുകയും ലൈവിലെത്തി അവരുടെ ചോദ്യങ്ങള്‍ക്ക് മറുപടി പറയുകയുമൊക്കെ ആര്യയുടെ പതിവുകളാണ്. എന്നാല്‍ ഈ ദിവസങ്ങള്‍ ആരാധകരിന്‍ നിന്ന് അതിരുകടന്ന ചോദ്യങ്ങളാണ് ആര്യയ്ക്ക് നേരിടേണ്ടിവന്നത്. സ്വകാര്യ ജീവിതത്തിലേക്ക് ചുഴിഞ്ഞ് നോക്കാനുള്ള താത്പര്യം ആര്യക്ക് മുന്നില്‍ പുറത്തെടുത്തവര്‍ക്ക് കുറിക്ക് കൊള്ളുന്ന മറുപടിയാണ് താരം നല്‍കിയതും.
ഇന്‍സ്റ്റഗ്രാം ചാറ്റില്‍ താരത്തോട് കന്യകയാണോ എന്ന് ചോദിച്ച ആരാധകന് മറുപടിയായി മകളെ ചുംബിക്കുന്ന ചിത്രമാണ് ആര്യ നല്‍കിയത്. ഇപ്പോഴിതാ ഭര്‍ത്താവുമൊത്തുള്ള വേര്‍പിരിയലിനെക്കുറിച്ച് വിശദീകരിച്ചുകൊണ്ട് താരം മറ്റൊരു പോസ്റ്റ് കുറിച്ചിരിക്കുന്നു.
ഇത്തരത്തിലൊരു പോസ്റ്റ് കുറിക്കേണ്ടിവരുമെന്ന് ഒരിക്കല്‍പോലും കരുതിയിട്ടില്ലെന്നും പക്ഷെ ആളുകള്‍ തന്റെ സ്വകാര്യ ജീവിതത്തിലേക്ക് അമിതമായി കടക്കുന്നതുകൊണ്ടാണ് ഇതെല്ലാം പറയുന്നതെന്നും കുറിച്ചാണ് ആര്യ തുടങ്ങുന്നത്. ഓരേ ചോദ്യം തന്നെ ആവര്‍ത്തിച്ച് കേട്ട് ക്ഷമ നശിച്ചതുകൊണ്ടാണ് അവസാനമായി ഒരിക്കല്‍കൂടി ഇത് വിശദീകരിക്കുന്നത് എന്ന് പറഞ്ഞുകൊണ്ട് താന്‍ ഒരു സിംഗിള്‍ മദര്‍ ആണെന്ന് ആര്യ എഴുതി. 'അതായത് ഞാനും എന്റെ ഭര്‍ത്താവും പിരിഞ്ഞിട്ട് കുലച്ച് കാലമായി. വളരെ നല്ല സുഹൃത്തുക്കളാണ് ഇപ്പോള്‍ ഞങ്ങള്‍. ഞങ്ങള്‍ ഒന്നിച്ചാണ് മകളുടെ കാര്യങ്ങള്‍ നോക്കുന്നത്. അവള്‍ക്ക് ഞങ്ങള്‍ എന്നും ഏറ്റവും മികച്ച മാതാപിതാക്കളായിരിക്കും', ആര്യ കുറിച്ചു. മകളുടെ അച്ഛന്റെ സ്വകാര്യതയെ താന്‍ മാനിക്കുന്നെന്നും അതുകൊണ്ട് അദ്ദേഹത്തെ പോസ്റ്റില്‍ ടാഗ് ചെയ്യുന്നില്ലെന്നും ആര്യ കുറിപ്പില്‍ ഉള്‍പ്പെടുത്തിയിട്ടുണ്ട്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ