മലയാളികള്‍ക്ക് ഏറെ പ്രിയങ്കരനായ ഫുട്‌ബോള്‍ താരമാണ് ഐഎം വിജയന്‍. കായികപരമായി മാത്രമല്ല, ചലച്ചിത്രമേഖലയിലും കഴിവ് തെളിയിച്ചയാളാണ് ഇദ്ദേഹം. ഇപ്പോള്‍ താരം ഒരു സിനിമ നിര്‍മിക്കുന്നു എന്ന വാര്‍ത്തയാണ് പുറത്തു വരുന്നത്. പാണ്ടി ജൂനിയേഴ്‌സ് എന്നാണ് അദ്ദേഹം നിര്‍മിക്കുന്ന ആദ്യ ചിത്രത്തിന്റെ പേര്.
'നെവര്‍ ബെറ്റ് എഗൈന്‍സ്റ്റ് അണ്ടര്‍ ഡോഗ്' എന്നാണ് ചിത്രത്തിന്റെ ടാഗ് ലൈന്‍. രണ്ടുമാസം മുന്‍പാണ് ഐഎം വിജയന്‍ സിനിമാ നിര്‍മാതാവാകുന്നുവെന്ന പ്രഖ്യാപനമുണ്ടായത്. ഫുട്‌ബോളുമായി ബന്ധപ്പെട്ടതാണ് ആദ്യ ചിത്രമെന്ന് അന്നേ പ്രഖ്യാപനമുണ്ടായിരുന്നു.
ടൈറ്റില്‍ ലോഞ്ചിനായി പുറത്തിറക്കിയ പോസ്റ്റര്‍ സിനിമയുടെ സ്വഭാവം സംബന്ധിച്ച് ഒരു സൂചനകളൊന്നും നല്‍കുന്നില്ല. യഥാര്‍ത്ഥ ജീവിതത്തെ അടിസ്ഥാനപ്പെടുത്തിയുള്ളതാണ് സിനിമയെന്നാണ് സൂചന. സിനിമയുടെ കൂടുതല്‍ വിവരങ്ങള്‍ പുറത്തുവിടാന്‍ നിര്‍മാതാക്കള്‍ തയ്യാറായിട്ടില്ല.
ബിഗ് ഡാഡി എന്റര്‍ടെയ്ന്‍മെന്റിന്റെ ബാനറില്‍ ഐഎം വിജയനും അരുണ്‍ തോമസും ദീപൂ ദാമോദറും ചേര്‍ന്നാണ് സിനിമ നിര്‍മ്മിക്കുന്നത്. നവാഗതനായ ദീപക് ഡിയോണാണ് ചിത്രത്തിന്റെ സംവിധാനവും രചനയും നിര്‍വഹിക്കുന്നത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ