ആഷിക് അബു സംവിധാനം ചെയ്ത വൈറസ് മികച്ച പ്രതികരണം നേടി മുന്നേറിക്കൊണ്ടിരിക്കുകയാണ്. വലിയ താരനിരയെ അണിനിരത്തിയാണ് ചിത്രം ഒരുക്കിയത്. ഇന്ദ്രന്‍സും ചിത്രത്തില്‍ മികച്ച വേഷത്തില്‍ എത്തിയിരുന്നു. മികച്ച അഭിപ്രായവും താരത്തിന്റെ പ്രകടനം നേടിയിരുന്നു. എന്നാല്‍ ഇപ്പോള്‍ സോഷ്യല്‍ മീഡിയയില്‍ വൈറലാവുന്നത് ഇന്ദ്രന്‍സിന്റെ ഒരു തകര്‍പ്പന്‍ മറുപടിയിലൂടെയാണ്.
വൈറസ് ടീം ഒരുമിച്ചെത്തിയ അഭിമുഖത്തിനിടെ നടന്‍ സെന്തില്‍ കുമാറിന്റെ ചോദ്യത്തിനാണ് താരം തഗ് ലൈഫ് മറുപടി നല്‍കിയത്. ഈ പടത്തില്‍ പഴയപോലെ ഒരു കോസ്റ്റിയൂമര്‍ ആയിരുന്നെങ്കില്‍ ഇതിലെ വൈറസിന് എന്ത് വേഷം നല്‍കും എന്നാണ് സെന്തില്‍ കുമാര്‍ ചോദിച്ചത്. നീ ആദ്യം വൈറസിനെ പിടിച്ച് അളവെടുക്കാന്‍ നിര്‍ത്തി താ... എന്നായിരുന്നു ഇന്ദ്രന്‍സിന്റെ മറുപടി. കൂടെയുണ്ടായിരുന്ന താരങ്ങള്‍ ചിരിച്ചുകൊണ്ടാണ് ഇന്ദ്രന്‍സിന്റെ ഉരുളയ്ക്ക് ഉപ്പേരിപോലെയുള്ള മറുപടിയെ ഏറ്റെടുത്തത്. ട്രോളന്മാരുടെ കണ്ണില്‍പെട്ടതോടെയാണ് ഇന്ദ്രന്‍സിന്റ് തഗ് ലൈഫ് മറുപടി വൈറലായത്. നടന്‍ ടൊവിനോ തോമസ് തഗ് ലൈഫ് എന്ന അടിക്കുറിപ്പോടെ വീഡിയോ ഇന്‍സ്റ്റഗ്രാമില്‍ പങ്കുവെക്കുകയും ചെയ്തു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ