തെരഞ്ഞെടുപ്പ് ഫലത്തിനായി ആവേശത്തോടെ കാത്തിരിക്കുകയായിരുന്നു രാജ്യം. മികച്ച വിജയം നേടി വീണ്ടും എന്‍ഡിഎ അധികാരത്തിലേറി. കേരളത്തില്‍ കോണ്‍ഗ്രസാണ് മികച്ച പ്രകടനം കാഴ്ചവെച്ചത്. പല പ്രവചനങ്ങളേയും നിഷ്പ്രഭമാക്കിക്കൊണ്ടായിരുന്നു തെരഞ്ഞെടുപ്പ് ഫലം. ഇപ്പോള്‍ സോഷ്യല്‍ മീഡിയയില്‍ വൈറലാവുന്നത് ഒരു തെരഞ്ഞെടുപ്പ് പ്രവചനമാണ്. ഒരു കൊച്ചു കുട്ടിയും നടന്‍ ജയസൂര്യയും തമ്മിലുള്ള സംഭാഷണമാണ് ആരാധക ശ്രദ്ധ നേടുന്നത്. 

എല്‍ഡിഎഫോ യൂഡിഎഫോ ബിജെപിയോ ആരാണ് തെരഞ്ഞെടുപ്പില്‍ ജയിക്കുക എന്നാണ് ജയസൂര്യ കുഞ്ഞിനോട് ചോദിക്കുന്നത്. അതിന് കുഞ്ഞ് നല്‍കിയ മറുപടിയാണ് കയ്യടി നേടുന്നത്. ഫലത്തെക്കുറിച്ച് പറയാം തനിക്ക് പ്രായമായിട്ടില്ലെന്നും പ്രായമാകുമ്പോള്‍ പറയാം എന്നുമാണ് കുഞ്ഞ് പറയുന്നത്. എന്നാണ് പ്രായമാകുക എന്ന ചോദ്യത്തിന് നാളെ ആകുമെന്നും നാളെ ഉച്ചയാവുമ്പോള്‍ ആര് ജയിക്കുമെന്നും മറുപടി പറയുന്നുണ്ട്. ഫല പ്രഖ്യാപനത്തിന്റെ തലേദിവസമാണ് വീഡിയോ ചിത്രീകരിച്ചിരിക്കുന്നത്. എന്തായാലും സോഷ്യല്‍ മീഡിയയില്‍ വൈറലാവുകയാണ് കുഞ്ഞിന്റെ മറുപടി.