മുംബൈ : സമയത്ത് ആംബുലന്‍സ് ലഭിക്കാതിരുന്നതിനെ തുടര്‍ന്ന് കൃത്യമായ പരിചരണം ലഭിക്കാതെ സിനിമാനടിയും കുഞ്ഞും മരിച്ചു. മറാത്തി നടി പൂജ സഞ്ജര്‍(25) നാണ് ദുരുണാന്ത്യം സംഭവിച്ചത്. പ്രസവവേദന കൊണ്ട് പുളഞ്ഞ നടിയെ ആശുപത്രിയില്‍ എത്തിക്കാന്‍ അംബുലന്‍സ് കിട്ടാന്‍ ബന്ധുക്കള്‍ കിണഞ്ഞ് ശ്രമിച്ചെങ്കിലും ലഭിച്ചില്ലെന്ന് പൊലീസ് പറഞ്ഞു.
മഹാരാഷ്ട്രയിലെ ഹിംഗോളി ജില്ലയില്‍ ഞായറാഴ്ച പുലര്‍ച്ചെ രണ്ട് മണിയോടെയാണ് സംഭവം. നടിയെ ബന്ധുക്കള്‍ തുടര്‍ന്ന് അടുത്തുള്ള പ്രാഥമിക ആരോഗ്യകേന്ദ്രത്തില്‍ എത്തിച്ചു. അവിടെ എത്തിയതും പൂജ പ്രസവിച്ചു. എന്നാല്‍ കുട്ടി ഏതാനും മിനുട്ടുകള്‍ക്കകം മരിച്ചു.
ഇതിനിടെ യുവതിയുടെ ആരോഗ്യസ്ഥിതി മോശമായതോടെ, ഉടന്‍ തന്നെ ഹിംഗോളി സിവില്‍ ആശുപത്രിയിലേക്ക് മാറ്റാന്‍ ഡോക്ടര്‍ നിര്‍ദേശിച്ചു. 40 കിലോമീറ്റര്‍ അകലെയുള്ള ഈ ആശുപത്രിയിലേക്ക് കൊണ്ടുപോകാന്‍ അംബുലന്‍സ് അന്വേഷിച്ച് ബന്ധുക്കള്‍ നടന്നെങ്കിലും ലഭിച്ചില്ല.
മണിക്കൂറുകള്‍ നീണ്ട പരിശ്രമത്തിനൊടുവില്‍ ഒരു സ്വകാര്യ ആംബുലന്‍സ് സംഘടിപ്പിച്ചാണ് ബന്ധുക്കള്‍ നടിയെ സിവില്‍ ആശുപത്രിയിലേക്ക് കൊണ്ടുപോയത്. എന്നാല്‍ വഴിമധ്യേ യുവതി മരിച്ചു. മറാത്തി സിനിമയില്‍ ശ്രദ്ധേയ താരമായിരുന്ന നടി, പ്രസവവുമായി ബന്ധപ്പെട്ട് അഭിനയത്തില്‍ നിന്ന് വിട്ടുനില്‍ക്കുകയായിരുന്നു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ