ബോളിവുഡ് നടൻ സഞ്ജയ് ദത്തിനൊപ്പമുള്ള മോഹൻലാലിന്റെ ചിത്രം കണ്ട് ആവേശത്തിലാകുകയായിരുന്നു ലാലേട്ടൻ ആരാധകർ. പുതിയ മോഹൻലാൽ ചിത്രം ബിഗ് ബ്രദറിൽ സഞ്ജയ് ഉണ്ടോ? ലൂസിഫറിന്റെ രണ്ടാം ഭാഗത്തിലാണോ ഇരുവരും ഒന്നിക്കുന്നത് എന്നെല്ലാമായിരുന്നു സോഷ്യൽ ലോകത്തെ സംശയങ്ങൾ. എന്നാൽ ആ ചിത്രത്തിന് പിന്നിലെ സത്യാവസ്ഥ വെളിപ്പെടുത്തിയിരിക്കുകയാണ് സംവിധായകന്‍ സിദ്ദിഖ്.
ബിഗ് ബ്രദറിന്റെ ചിത്രീകരണത്തിനായി മൈസൂരിലെ ഹോട്ടലിൽ താമസിച്ചപ്പോഴാണ് സഞ്ജയ് ദത്തിനെ കണ്ടതും ചിത്രം പകർത്തിയതെന്നും സിദ്ദിഖ് പറയുന്നു. ‘ഷൂട്ടിങ്ങിനായി ബിഗ് ബ്രദര്‍ സംഘം മൈസൂരില്‍ താമസിച്ച ഹോട്ടലിൽ തീര്‍ത്തും യാദൃശ്ചികമായി സഞ്ജയ് ദത്തും കൂട്ടരും എത്തുകയുണ്ടായി. അവിടെ വെച്ച് സഞ്ജയ് മലയാള സിനിമ സംഘത്തിന് ഒരു പാര്‍ട്ടി ഒരുക്കുകയും ചെയ്തു. എനിക്ക് പങ്കെടുക്കാന്‍ കഴിഞ്ഞില്ലെങ്കിലും ലാല്‍ ഒപ്പം ചേര്‍ന്നു. ആലിയ ഭട്ടും മഹേഷ് ഭട്ടും അവിടെ താമസക്കാരായുണ്ടായിരുന്നു’, സിദ്ധിഖ് പറഞ്ഞു. പാർട്ടിക്കിടയിൽ പകർത്തിയ ചിത്രമാണ് മോഹൻലാൽ സോഷ്യൽ മീ‌ഡിയയിൽ പങ്കുവച്ചത്.
‘ബിഗ് ബ്രദര്‍ വിത്ത് മുന്നാഭായി’ എന്നാണ് ചിത്രം പങ്കുവച്ചുകൊണ്ട് മോഹൻലാൽ കുറിച്ചത്.
ലേഡീസ് ആന്‍ഡ് ജെന്റില്‍മാന്‍ എന്ന ചിത്രത്തിന് ശേഷം മോഹന്‍ലാലിനെ നായകനാക്കി സിദ്ദിഖ് ഒരുക്കുന്ന ചിത്രമാണ് ബിഗ് ബ്രദര്‍. ബോളിവുഡ് താരം അര്‍ബാസ് ഖാൻ ചിത്രത്തിൽ ഒരു പ്രധാന വേഷത്തിലെത്തുന്നുണ്ട്. ജനാര്‍ദ്ദനന്‍, സിദ്ദിഖ്, വിഷ്ണു ഉണ്ണികൃഷ്ണന്‍, അനൂപ് മേനോന്‍, ടിനി ടോം, ചെമ്പന്‍ വിനോദ് എന്നിവരാണ് മറ്റ് താരങ്ങൾ.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ