ഇരിപത്തിമൂന്ന് വർഷങ്ങൾക്ക് മുമ്പുള്ള നടി മഞ്ജു വാര്യരുടെ ചിത്രം പങ്കുവച്ചുകൊണ്ട് ഇപ്പോഴത്തെ മഞ്ജുവുമായുള്ള താരതമ്യമാണ് സോഷ്യൽ മീഡിയയിൽ വൈറലാകുന്നത്. സമ്മർ ഇൻ ബെത്‌ലഹേം എന്ന സിനിമയിലെ താരത്തിന്റെ ലുക്ക് ആണ് ആദ്യ ചിത്രത്തിലുള്ളത്. 1997ൽ പകർത്തിയതാണ് ഇത്.
സിനിമ മേക്കപ്പ് ആർട്ടിസ്റ്റ് രാജേഷ് നെന്മാറ പങ്കുവച്ച ചിത്രമാണ് ഇപ്പോൾ ശ്രദ്ധേയമായിരിക്കുന്നത്. രണ്ട് ചിത്രങ്ങളും തമ്മിൽ 23 വർഷത്തെ വ്യത്യാസമുണ്ട്. മഞ്ജുവിന്റെ പുതിയ ചിത്രം ചതുർമുഖത്തിലെ ലുക്കാണ് രണ്ടാമത്തെ ചിത്രത്തിലുള്ളത്. സമ്മർ ഇൻ ബെത്‌ലഹേമിൽ മഞ്ജുവിനെ അഭിരാമിയാക്കി ഒരുക്കാൻ രാജേഷ് സഹായിയായി ഉണ്ടായിരുന്നു. ചതുർമുഖത്തില്‍ മഞ്ജുവിന് മേക്കപ്പ് ഒരുക്കുന്നത് രാജേഷ് നെന്മാറ തന്നെയാണ്.
രഞ്ജീത് കമല ശങ്കര്‍, സലീല്‍ വി എന്നീ പുതുമുഖ സംവിധായകർ ചേര്‍ന്ന് ഒരുക്കുന്ന ഹൊറർ ചിത്രമാണ് ചതുര്‍മുഖം. സണ്ണി വെയ്നും മഞ്ജു വാരിയരും ആദ്യമായി ഒന്നിക്കുന്ന ചിത്രം കൂടിയാണ് ഇത്. ജിസ്‌ടോംസ് മൂവീസിന്‍റെ ബാനറില്‍ ജിസ്സ് ടോംസ്സും ജസ്റ്റിന്‍ തോമസും ചേര്‍ന്നാണ് ചിത്രം നിർമിക്കുന്നത്. മരക്കാര്‍ അറബിക്കടലിന്‍റെ സിംഹം, ലളിതം സുന്ദരം, ജാക്ക് ആന്‍ഡ് ജില്‍, കയറ്റം എന്നിവയാണ് മഞ്ജുവിന്‍റേതായി ഈ വർഷം പുറത്തിറങ്ങാനിരിക്കുന്ന ചിത്രങ്ങള്‍.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ