ഹിറ്റ് ഷോർട്ട്ഫിലിം കുളിസീനിന്റെ രണ്ടാം ഭാ​ഗം പുറത്ത്. സംവിധായകൻ ജൂഡ് ആന്റണിയും നടി സ്വാസ്തികയുമാണ് രണ്ടാം ഭാ​ഗത്തിൽ പ്രധാനവേഷത്തിൽ എത്തുന്നത്.  മറ്റൊരു കടവിൽ എന്നു പേരിട്ടിരിക്കുന്ന ചിത്രം രാഹുൽ കെ. ഷാജി സംവിധാനം ചെയ്തിരിക്കുന്നത്. ചിത്രം പുറത്തിറങ്ങി മണിക്കൂറുകൾക്കുള്ളിൽ ഓൺലൈനില്‍ തരംഗമാവുകയാണ്.

രമേശൻ എന്ന ചെറുപ്പക്കാരനായി ജൂഡും ഭാര്യ ​ഗീതയായി സ്വാസ്തകയുമാണ് എത്തുന്നത്. ഇരുവരുടെ വിവാഹത്തോടെയാണ് കഥ ആരംഭിക്കുന്നത്. വീടിനടുത്തുള്ള പാറമടയിലെ ഭാര്യയുടെ ഉറക്കം പോകുന്ന രമേശൻ ചെയ്തുകൂട്ടുന്ന കാര്യങ്ങളാണ് ചിത്രത്തിലുള്ളത്. ജൂഡിന്റെയും സ്വാസികയുടെയും പ്രകടനം തന്നെയാണ് ചിത്രത്തിന്റെ പ്രധാനആകർഷണം. കോമഡി താരമായ പാഷാണം ഷാജിയും സംവിധായകൻ ബോബൻ സാമുവലുമാണ് കയ്യടിനേടുന്ന മറ്റ് കഥാപാത്രങ്ങൾ. കുളിസീൻ ആദ്യഭാഗത്തിലെ നായകനായ മാത്തുക്കുട്ടിയും അതിഥി വേഷത്തിൽ എത്തുന്നുണ്ട്.

2013 ൽ ആണ് മാത്തുക്കുട്ടി പ്രധാനവേഷത്തിൽ എത്തിയ കുളിസീൻ എത്തുന്നത്. ഇത് ഹിറ്റായതോടെയാണ് ഏഴ് വർഷങ്ങൾക്ക് ശേഷം മറ്റൊരു കുളിക്കടവ് കഥയുമായി വീണ്ടും എത്തിയത്. ഏരിയ ഹെന്ന പ്രൊഡക്‌ഷൻസിന്റെ ബാനറിൽ സുനിൽ നായരാണ് ചിത്രം നിർമിക്കുന്നത്. സംഗീത സംവിധായകൻ രാഹുൽ രാജ് സംഗീതം. തിരക്കഥ സംഭാഷണം ഒരുക്കുന്നത് സുമേഷ് മധു. നേരത്തെ ചിത്രത്തിന്റെ ടീസറും ഹിറ്റായിരുന്നു.