മധുരരാജയിലെ ബോളിവുഡ് സുന്ദരി സണ്ണി ലിയോണിയുടെ മോഹമുന്തിരിയുടെ ചൂടാറും മുന്‍പേ മറ്റൊരു ഐറ്റം ഡാന്‍സുമായി എത്തുകയാണ് മമ്മൂട്ടി. പുതിയ ചിത്രം ഷൈലോക്കിലെ ബാര്‍ ഡാന്‍സാണ് സോഷ്യല്‍ മീഡിയയില്‍ തരംഗമാകുന്നത്. കണ്ണേ കണ്ണേ എന്നു തുടങ്ങുന്ന തമിഴ്ഗാനം ആരാധകരുടെ മനം കവരുകയാണ്. മൂന്ന് സുന്ദരികളുടെ ചടുലമായ നൃത്തച്ചുവടുകളാണ് ഗാനത്തെ മനോഹരമാക്കുന്നത്. അതിനൊപ്പം മമ്മൂട്ടിയുടെ സ്റ്റൈലിഷ് സാന്നിധ്യം കൂടിയായപ്പോള്‍ കൂടുതല്‍ കളര്‍ഫുള്ളായി.
വിവേകയുടെ വരികള്‍ക്ക് ഗോപി സുന്ദര്‍ സംഗീതം നല്‍കി ശ്വേത അശോക്, നാരായണി ഗോപന്‍, നന്ദ ജെ ദേവന്‍ എന്നിവര്‍ ചേര്‍ന്നാണ് ഗാനം ആലപിച്ചിരിക്കുന്നത്. ഇന്നലെയാണ് ചിത്രത്തിന്റെ ഓഡിയോ ലോഞ്ച് ദുബായില്‍ നടന്നത്. പരിപാടിയുടെ ചിത്രങ്ങളും സമൂഹമാധ്യമങ്ങളില്‍ വൈറലായിട്ടുണ്ട്. ഗാനത്തിന് മികച്ച പ്രതികരണമാണ് ലഭിക്കുന്നത്. ഇതിനോടകം നാല് ലക്ഷത്തോളം പേരാണ് വിഡിയോ കണ്ടത്.
അജയ് വാസുദേവ് സംവിധാനം ചെയ്തിരിക്കുന്ന ഷൈലോക്ക് ജനുവരി 23നാണ് തീയെറ്ററില്‍ എത്തുന്നത്. നേരത്തെ ചിത്രത്തിലെ മമ്മൂട്ടിയുടെ ഡാന്‍സ് ടീസര്‍ വലിയ ശ്രദ്ധനേടിയിരുന്നു. ഗുഡ് വില്‍എന്റര്‍ടെയ്ന്‍മെന്റിന്റെ ബാനറില്‍ ജോബി ജോര്‍ജാണ് ചിത്രം നിര്‍മിക്കുന്നത്. നടന്‍ രാജ് കിരണ്‍ ആദ്യമായി അഭിനയിക്കുന്ന മലയാള ചിത്രം എന്ന പ്രത്യേകതയും ഷൈലോക്കിനുണ്ട്.ചിത്രത്തില്‍ മീനയും ഒരു പ്രധാന വേഷത്തില്‍ എത്തുന്നു. ബിബിന്‍ മോഹനും അനീഷും ചേര്‍ന്നാണ് ചിത്രത്തിന് തിരക്കഥയൊരുക്കുന്നത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ