മലയാളത്തിലെ എക്കാലത്തേയും മികച്ച അഭിനേതാക്കളിൽ ഒരാളാണ് ഉർവശി. സിനിമയിലെ എത്ര ചെറിയ കഥാപാത്രമാണെങ്കിലും അതിനെ മനോഹരമാക്കാൻ ഉർവശിക്ക് പ്രത്യേക കഴിവാണ്. തമാശയും പ്രണയവും ദുഃഖവുമെല്ലാം അതിമനോഹരമായാണ് താരത്തിന്റെ മുഖത്ത് തെളിയുന്നത്. അടുത്തിടെ ഇറങ്ങിയ വരനെ ആവശ്യമുണ്ട് എന്ന ചിത്രത്തിലും ഉർവശിയുടെ പ്രകടനം കയ്യടി നേടിയിരുന്നു. 

ഇപ്പോൾ ഉർവശിയുടെ പ്രകടനത്തെ പുകഴ്ത്തി രം​ഗത്തെത്തിയിരിക്കുകയാണ് ചിത്രത്തിന്റെ സംവിധായകൻ അനൂപ് സത്യൻ. താരത്തിന്റെ അഭിനയപ്രകടനം വെളിപ്പെടുത്തുന്ന ഒരു വിഡിയോയ്ക്കൊപ്പമാണ് പോസ്റ്റ്. ചിത്രത്തിലെ ​ഗാനത്തിൽ ഉൾപ്പെടുത്താനായി എടുത്ത ചെറിയ രം​ഗമാണ് വിഡിയോയിൽ. വിഡിയോ സീക്വൻസ് എടുക്കാനായി ചെറുതായി വിശദീകരിച്ചുകൊടുക്കുകയാണ് ചെയ്യുന്നത്. അഭിനേതാക്കളാണ് അവരുടെ ഇഷ്ടത്തിന് ചെയ്യേണ്ടത്. ഉർവശിചേച്ചിയുടെ കാര്യത്തിൽ അവരോട് കട്ട് പറയാൻ ബുദ്ധിമുട്ടാണ് എന്നാണ് അനൂപ് കുറിച്ചിരിക്കുന്നത്. 

ശോഭനയുടേയും സുരേഷ് ​ഗോപിയുടേയും തിരിച്ചുവരവ് എന്ന രീതിയിലാണ് വരനെ ആവശ്യമുണ്ട് ശ്രദ്ധ നേടിയത്. ദുൽഖർ സൽമാനും കല്യാണി പ്രിയദർശനും പ്രധാന വേഷത്തിലും എത്തിയിരുന്നു. എന്നാൽ ചിത്രം പുറത്തിറങ്ങിയതോടെ ചെറിയ വേഷത്തിൽ എത്തുന്ന ഉർവശിയുടെ പ്രകടനമാണ് ഏറ്റവും പ്രശംസ പിടിച്ചുപറ്റിയത്.