ഫാഷൻ കാര്യങ്ങളിൽ മലായാള താരങ്ങളിൽ മുന്നിൽ നിൽക്കുന്നത് നടി പൂർണിമ ഇന്ദ്രജിത് ആണെന്ന് നിസ്സംശയം പറയാം. മലയാളത്തിന്റെ ഫാഷൻ ഐക്കൺ എന്ന വിശേഷണമാണ് പൂർണിമയ്ക്ക് ആരാധകർ സമ്മാനിക്കുന്നത്. വർഷങ്ങളായി തങ്ങൾ കാണുന്ന പൂർണിമയ്ക്ക് ഇന്നും യാതൊരു മാറ്റവും സംഭവിച്ചിട്ടില്ലെന്നത് ആരാധകരെ അത്ഭുതപ്പെടുത്തുന്നതാണ്. ഇപ്പോഴിതാ താരത്തിന്റെ ഒരു ത്രോബാക്ക് ചിത്രമാണ് ആരാധകർക്കിടയിൽ ചർച്ചയാകുന്നത്. 

‘പൂർണിമ മോഹൻ, പത്ത് സി’ എന്ന അടിക്കുറിപ്പോടെയാണ് താരം ചിത്രം പോസ്റ്റ് ചെയ്തിരിക്കുന്നത്. എന്നാൽ ചിത്രം കണ്ടതും ഇളയമകൾ നക്ഷത്രയുമായുള്ള സാമ്യമാണ് ചർച്ചയാകുന്നത്. ആരാധകരും സഹപ്രവർത്തകരുമടക്കം നച്ചുവുമായുള്ള സാമ്യം ചൂണ്ടിക്കാണിക്കുന്നുണ്ട്. ശരിക്കും നക്ഷത്രയേപ്പോലുണ്ട് എന്നായിരുന്നു നട‌ി അഹാനയുടെ കമന്റ്. ഇത് ശരിവച്ച് നിരവധി ആരാധകരും കമന്റുകളുമായി എത്തി. 

അഭിനയത്തിൽ നിന്ന് ഇടവേളയെടുത്ത പൂർണിമ സംരംഭകയായാണ് പിന്നീട് സജീവമായത്. ഇതിന് ശേഷം അവതാരകയായി വീണ്ടും ക്യാമറയ്ക്ക് മുന്നിലെത്തിയ പൂർണിമ അഷ്ക് അബു ഒരുക്കിയ വൈറസ് എന്ന ചിത്രത്തിലൂടെ സിനിമയിലേക്കും തിരിച്ചുവരവ് നടത്തി. അടുത്തിടെ മികച്ച ബിസിനസ് സംരംഭകയ്ക്കുളള സംസ്ഥാന സർക്കാരിന്റെ പുരസ്‌കാരവും പൂർണിമയെ തേടി എത്തിയിരുന്നു.