സിനിമയിൽ നിന്ന് ചെറിയ ഇടവേളയെടുത്തിരിക്കുകയാണെങ്കിൽ ഷാരുഖ് ഖാൻ ഇന്നും ആരാധകർക്ക് പ്രീയങ്കരൻ തന്നെയാണ്. താരം സോഷ്യൽ മീഡിയയിൽ പങ്കുവെക്കുന്ന ചിത്രങ്ങളെല്ലാം ആരാധകരെ ആവേശം കൊള്ളിക്കാറുണ്ട്. ഇപ്പോൾ സോഷ്യൽ മീഡിയയിൽ വൈറലാവുന്നത് താരത്തിന്റെ ഐപിഎൽ അപ്പിയറൻസ് ആണ്. തന്റെ ടീമായ കൊൽക്കത്ത നൈറ്റ് റൈഡേഴ്സിന് പിന്തുണയുമായാണ് താരം കളിക്കളത്തിൽ എത്തിയത്. 

ദുബായ് രാജ്യാന്ത്ര സ്റ്റേഡിയത്തിൽ കഴിഞ്ഞ ദിവസം നടന്ന കൊൽക്കത്ത നൈറ്റ് റൈഡേഴ്സ്- രാജസ്ഥാൻ റോയൽ‌സ് മത്സരം കാണാനാണ് താരം എത്തിയത്. കൊൽക്കത്ത ടീമിന് മാച്ചിങ്ങാവുന്ന ഔട്ട്ഫിറ്റിലായിരുന്നു താരം. മുടി നീട്ടി വളർത്തി മാസ്കും കൂളിങ് ​ഗ്ലാസും തൊപ്പിയും അണിഞ്ഞുള്ള താരത്തിന്റെ ചിത്രങ്ങൾ സോഷ്യൽ മീഡിയയെ ആവേശത്തിലാക്കുകയാണ്. 

താരത്തിന്റെ മൂത്ത മകൻ ആര്യനുമായാണ് എസ്‌ആർ‌കെ ദുബായിലെത്തിയത്. പതിവുപോലെ ഇക്കുറിയും സ്റ്റേഡിയത്തിലിരുന്ന് എസ്ആർകെ തന്റെ ടീം അംഗങ്ങളുടെ മനോവീര്യം വർധിപ്പിച്ചു. ടീം അം​ഗങ്ങൾക്കായി എഴുന്നേറ്റു നിന്ന് കയ്യടിക്കുന്നതിന്റേയും മാസ്ക് ഊരി മാറ്റി അവർക്ക് മുഖം കൊടുക്കുന്നതിന്റേയും വിഡിയോയും വൈറലാവുന്നുണ്ട്.

ബുധനാഴ്ച നടന്ന മത്സരത്തിൽ ഇന്ത്യൻ പ്രീമിയർ ലീഗിൽ തുടർച്ചയായ മൂന്നാം ജയം പ്രതീക്ഷിച്ചിറങ്ങിയ രാജസ്ഥാന് കൊൽക്കത്തയ്ക്ക് മുന്നിൽ അടിതെറ്റുകയായിരുന്നു. 37 റൺസിനാണ് നൈറ്റ് റൈഡേഴ്സ് രാജസ്ഥാൻ റോയൽസിനെ പരാജയപ്പെടുത്തിയത്.