എംടി വാസുദേവൻ നായരുടെ രണ്ടാമൂഴത്തിനായി മലയാളികൾ പ്രതീക്ഷയോടെ കാത്തിരിക്കാൻ തുടങ്ങിയിട്ട് കാലങ്ങളായി. പല കാരണങ്ങൾ കൊണ്ട് ചിത്രം യാഥാർത്ഥ്യമായില്ല. രണ്ടാമൂഴവുമായി പ്രിയദർശൻ എത്തിയാലോ? സിനിമപ്രേമികൾക്കിടയിൽ ചൂടുപിടിച്ച ചർച്ചയാവുകയാണ് ഇത്.
പ്രിയദർശൻ തന്നെയാണ് എംടിയുടെ തിരക്കഥയിൽ സിനിമ സംവിധാനം ചെയ്യുമെന്ന് വ്യക്തമാക്കിക്കൊണ്ട് രംഗത്തെത്തിയത്. ഇതോടെ രണ്ടാമൂഴമാണ് ആ ചിത്രം എന്ന തരത്തിൽ വാർത്തകൾ പ്രചരിക്കാൻ തുടങ്ങി. ഒരു യൂട്യൂബ് ചാനലിന് നൽകിയ അഭിമുഖത്തിലൂടെയായിരുന്നു വെളിപ്പെടുത്തൽ. ഒരു വലിയ സിനിമയല്ലെങ്കില്‍ ഒരു ചെറിയ സിനിമ ഈ വര്‍ഷം തന്നെ എംടി സാറിന്‍റെ കൂടെയുണ്ടെന്നാണ് പ്രിയദർശൻ പറഞ്ഞത്. എന്നാല്‍ കൂടുതല്‍ വിവരങ്ങള്‍ ഈ ഘട്ടത്തില്‍ നല്‍കാനാവില്ലെന്നും അദ്ദേഹം വ്യക്തമാക്കി. എം ടി വാസുദേവന്‍ നായരുടെ തിരക്കഥയില്‍ ഒരു സിനിമ സംവിധാനം ചെയ്യുക എന്നത് പ്രിയദർശന്റെ വലിയ ആഗ്രഹമായിരുന്നു.
പ്രിയദര്‍ശന്‍ പറയുന്ന എംടിയുടെ തിരക്കഥ 'രണ്ടാമൂഴം' ആയിരിക്കുമോ എന്ന ആകാംക്ഷയിലാണ് സിനിമാപ്രേമികള്‍. വി എ ശ്രീകുമാറിന്‍റെ സംവിധാനത്തില്‍ പ്രഖ്യാപിക്കപ്പെട്ടിരുന്ന 'രണ്ടാമൂഴം' മുടങ്ങിപ്പോയിരുന്നു. എംടിക്കും ശ്രീകുമാറിനും ഇടയിലുണ്ടായ നിയമതര്‍ക്കത്തിനു പിന്നാലെ ചിത്രത്തിന്‍റെ തിരക്കഥ ശ്രീകുമാര്‍ എംടിയെ തിരിച്ചേല്‍പ്പിച്ചിരുന്നു. പ്രിയദർശൻ രണ്ടാമൂഴം സംവിധാനം ചെയ്യണമെന്ന ആഗ്രഹം ആ സമയത്ത് തന്നെ നിരവധി ആരാധകർ പങ്കുവെച്ചിരുന്നു. പുതിയ ചിത്രം മരക്കാൻ ദേശിയ അംഗീകാരം വാരിക്കൂട്ടിയതോടെ പ്രിയദർശനിലെ പ്രതീക്ഷയും ഉയർന്നിരിക്കുകയാണ്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ