ബോളിവുഡിൽ ഏറ്റവും ആരാധകരുള്ള നായികമാരിൽ ഒരാളാണ് ദീപിക പദുക്കോൺ. അടുത്തിടെയായി സോഷ്യൽ മീഡിയയിൽ അത്ര ആക്റ്റീവായിരുന്നില്ല താരം. ഇപ്പോൾ ഇതാ ആരാധകരെ ഞെട്ടിച്ചുകൊണ്ട് തന്റെ സോഷ്യൽ മീഡിയയിലെ മുഴുവൻ പോസ്റ്റുകളും നീക്കം ചെയ്തിരിക്കുകയാണ് താരം. ഫേയ്സ്ബുക്ക്, ട്വിറ്റർ, ഇൻസ്റ്റഗ്രാം എന്നിവയിൽ ഇതുവരെയുണ്ടായിരുന്നു എല്ലാ പോസ്റ്റുകളുമാണ് താരം നീക്കിയത്.
പുതുവർഷത്തിലെ താരത്തിന്റെ അപ്രതീക്ഷിത നീക്കം ആരാധകരെ ഞെട്ടിച്ചിരിക്കുകയാണ്. പോസ്റ്റുകൾ നീക്കാനുണ്ടായ കാരണം താരം വ്യക്തമാക്കിയിട്ടില്ല. ഏകദേശം 5.2 കോടി ഫോളേവേഴ്‌സാണ് ദീപികയ്ക്ക് ഇന്‍സ്റ്റാഗ്രാമിലുണ്ടായിരുന്നത്. ഫെയ്‌സ്ബുക്കിൽ നാലു കോടിയോളം ഫോളോവേഴ്സും ട്വിറ്ററില്‍ 2.7 കോടിയോളം പേരും താരത്തിനുണ്ട്. മാത്രവുമല്ല ഇന്‍സ്റ്റാഗ്രാമില്‍ ബ്രാന്‍ഡ് പ്രമോഷനിലൂടെ കോടിക്കണക്കിന് രൂപയുടെ വരുമാനവുമുണ്ടായിരുന്നു.
പോസ്റ്റുകൾ നീക്കിയതിന് പിന്നാലെ ഫേയ്സ്ബുക്കിൽ പുതിയ പ്രൊഫൈൽ ചിത്രം പങ്കുവെച്ചിട്ടുണ്ട്. എന്തായാലും ദീപികയുടെ നീക്കം വലിയ ചര്‍ച്ചയായി മാറിയിരിക്കുകയാണിപ്പോള്‍. പ്രധാനപ്പെട്ട എന്തോ ഒരു കാര്യം ദീപിക പ്രഖ്യാപിക്കുവാന്‍ ഒരുങ്ങുകയാണെന്നും അതിന്റെ ഭാഗമായി ഒരു ചര്‍ച്ച സൃഷ്ടിക്കാന്‍ പോസ്റ്റുകള്‍ നീക്കം ചെയ്തതായിരിക്കാമെന്നും റിപ്പോര്‍ട്ടുകളുണ്ട്.
അടുത്തിടെ നടൻ സുശാന്ത് സിങ് രജ്പുത്തിന്റെ മരണവുമായി ബന്ധപ്പെട്ട മയക്കുമരുന്നു കേസിൽ ദീപികയെ അന്വേഷണ സംഘം ചോദ്യം ചെയ്യാൻ വിളിപ്പിച്ചത് വലിയ ചർച്ചയായിരുന്നു. അതിനു ശേഷം സോഷ്യൽ മീഡിയയിൽ വലിയ രീതിയിൽ ആക്റ്റീവായിരുന്നില്ല താരം. ഇപ്പോൾ പുതിയ സിനിമയുടെ ഷൂട്ടിങ് തെരക്കിലാണ് ദീപിക.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ