മലയാളത്തിന്റെ പ്രിയ സംവിധായകനും എഴുത്തുകാരനുമായ ലോഹിതദാസ് വിടപറഞ്ഞിട്ട് 12 വർഷമാവുകയാണ് ഇന്ന്. എന്നും ഓർമിക്കാൻ ഒരുപിടി സിനിമകൾ ബാക്കിയാക്കിയാണ് അദ്ദേഹം വിടപറഞ്ഞത്. ഇപ്പോൾ ലോഹിതദാസിന്റെ ഓർമകൾ പങ്കുവെക്കുകയാണ് നടൻ പൃഥ്വിരാജ്. ഇരുവരും ഒന്നിച്ച് പ്രവർത്തിച്ച ചക്രം എന്ന സിനിമയിലെ സെറ്റിൽ നിന്നുള്ള ചിത്രത്തിനൊപ്പമാണ് താരത്തിന്റെ കുറിപ്പ്.
ലോഹിതദാസിനൊപ്പം മറ്റൊരു ചിത്രം ചെയ്യാനിരിക്കുമ്പോഴാണ് അദ്ദേഹത്തിന്റെ വിയോഗമെന്നും തന്റെ ഏറ്റവും വലിയ നഷ്ടമാണ് ഇതെന്നുമാണ് താരം കുറിക്കുന്നത്. ’ഒരു നടനെന്ന നിലയിൽ എന്നെ ഏറ്റവും കൂടുതൽ സ്വാധീനിച്ച വ്യക്തിയാണ് ലോഹി സർ. അദ്ദേഹത്തോടൊപ്പമുള്ള ഒരൊറ്റ സിനിമ കൊണ്ട് അഭിനയത്തിന്റെ പല തലങ്ങളെ കുറിച്ച് എനിക്ക് മനസിലായി. അദ്ദേഹത്തോടൊപ്പം മറ്റൊരു ചിത്രം ചെയ്യാനിരിക്കവെയാണ് അദ്ദേഹം നമ്മെ വിട്ട് പോകുന്നത്. അതെന്നും എന്റെ വലിയൊരു നഷ്ടമായിരിക്കും. എന്നും നമ്മുടെ മനസിലുണ്ട്. ഇതിഹാസം’ - പൃഥ്വിരാജ് കുറിച്ചു.
ലോഹിതദാസ് എഴുതി സംവിധാനം ചെയ്ത ചിത്രമായിരുന്നു ചക്രം. 2003ലാണ് ചിത്രം പുറത്തിറങ്ങിയത്. മീര ജാസ്മിൻ നായികയായി എത്തിയ ചിത്രത്തിൽ ലോറി ഡ്രൈവറായാണ് പൃഥ്വിരാജ് എത്തുന്നത്. 54ാം വയസിൽ 2009 ലായിരുന്നു ലോഹിതദാസിന്റെ അപ്രതീക്ഷിത മരണം.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ