തെന്നിന്ത്യയിലെ മികച്ച സംവിധായകരിൽ ഒരാളാണ് റാം. തന്റെ നാല് ചിത്രങ്ങളിലൂടെ തന്നെ സിനിമാപ്രേമികളുടെ മനസിൽ ഇടം നേടാൻ റാമിനായി. മമ്മൂട്ടിയെ പ്രധാനകഥാപാത്രമാക്കി ഒരുക്കിയ പേരൻപ് ആയിരുന്നു അദ്ദേഹത്തിന്റെ അവസാന ചിത്രം. ഇപ്പോൾ റാമിന്റെ പുതിയ ചിത്രത്തെക്കുറിച്ചുള്ള റിപ്പോർട്ടുകളാണ് പുറത്തുവരുന്നത്. മലയാളത്തിലെ യുവനടൻ നിവിൻ പോളി റാമിന്റെ പുതിയ ചിത്രത്തിൽ നായകനാവും എന്നാണ് പുറത്തുവരുന്ന റിപ്പോർട്ടുകൾ.
തമിഴിലും മലയാളത്തിലുമായാണ് റാം പുതിയ ചിത്രം ഒരുക്കുന്നത്. ചിത്രത്തെക്കുറിച്ചുള്ള പ്രഖ്യാപനം ഉടനുണ്ടാകുമെന്നാണ റിപ്പോർട്ടുകൾ.തെന്നിന്ത്യൻ സിനിമാലോകത്തെ പിആർ ആയ നിഖിൽ മുരുകനാണ് റാമും നിവിൻ പോളിയും ഒന്നിക്കുന്നുവെന്ന വാർത്ത പുറത്തുവിട്ടത്. ചിത്രവുമായി ബന്ധപ്പെട്ടവർ ഇത് സ്ഥിരീകരിച്ചുവെന്നും ട്വീറ്റിൽ പറയുന്നു.
തമിഴിൽ നിരവധി ആരാധകരുള്ള നടനാണ് നിവിൻ പോളി. താരത്തിന്റെ നേരം, പ്രേമം തുടങ്ങിയ ചിത്രങ്ങൾ തമിഴ് പ്രേക്ഷകർ ഏറ്റെടുത്തിരുന്നു. തുടർന്ന് റിച്ചി എന്ന തമിഴ് ചിത്രത്തിൽ നായകനായി എത്തിയെങ്കിലും വിജയം നേടാനായില്ല. അതേസമയം നിരവധി ശ്രദ്ധേയ ചിത്രങ്ങളാണ് നിവിന്‍ പോളിയുടേതായി പുറത്തുവരാനുള്ളത്. രാജീവ് രവിയുടെ തുറമുഖം, ലിജു കൃഷ്‍ണയുടെ പടവെട്ട്, രതീഷ് ബാലകൃഷ്‍ണന്‍ പൊതുവാളിന്‍റെ കനകം കാമിനി കലഹം, എബ്രിഡ് ഷൈനിന്‍റെ മഹാവീര്യര്‍ എന്നിവയാണ് അണിയറയിൽ ഒരുങ്ങുന്നത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ