പ്രണയം അവസാനിപ്പിച്ച് 17 വര്‍ഷം മുമ്പ് രണ്ടുവഴിക്ക് പിരിഞ്ഞ താരജോഡിയായ ജെന്നിഫര്‍ ലോപ്പസും ബെന്‍ അഫ്‌ളെക്കും വീണ്ടും ഒരുമിക്കുന്നെന്ന് റിപ്പോര്‍ട്ടുകള്‍. 51കാരിയായ ജെന്നിഫറിനെയും 48കാരനായ ബെന്നിനെയും ഒന്നിച്ച് അമേരിക്കയിലെ മൊണ്ടാനയില്‍ കണ്ടതോടെയാണ് ഇത്തരത്തില്‍ റിപ്പോര്‍ട്ടുകള്‍ എത്തിതുടങ്ങിയത്. ഇതിനുമുമ്പ് ലോസ്ആഞ്ചലസിലെ വീട്ടില്‍ വച്ചെടുത്ത ഇരുവരും ഒന്നിച്ചുള്ള ഒരു ചിത്രവും പുറത്തുവന്നിരുന്നു. 

മൊണ്ടാനയിലാണ് ഇപ്പോള്‍ ബെന്‍ താമസിക്കുന്നത്. 2002ല്‍ ആഘോഷമായി വിവാഹനിശ്ചയം നടത്തിയെങ്കിലും രണ്ടുവര്‍ഷത്തിന് ശേഷം ഇരുവരും വേര്‍പിരിഞ്ഞു. ബേസ്‌ബോള്‍ കളിക്കാരന്‍ അലക്‌സ് റോഡ്രിഗസ്സുമായുള്ള ബന്ധം അവസാനിപ്പിച്ചിരിക്കുകയാണ് നിലവില്‍ ജെന്നിഫര്‍. ഈ വര്‍ഷം ജനുവരിയില്‍ ബെന്‍ നടി അമ്മ ഡി അര്‍മാസുമായി വേര്‍പിരിഞ്ഞു. ഇതോടെ ബെന്നിഫര്‍ പ്രണയം വീണ്ടും മൊട്ടിട്ടെന്നാണ് ആരാധകര്‍ കരുതുന്നത്.