അഹമ്മദാബാദ്:  ഗുജറാത്ത് തെരഞ്ഞെടുപ്പിന് ദിവസങ്ങള്‍ മാത്രം അവശേഷിക്കേ, ഓഹരി വിപണിയില്‍ കൃത്രിമം കാണിച്ചതിന്റെ പേരില്‍ ഗുജറാത്ത് മുഖ്യമന്ത്രി വിജയ് രൂപാണിയുടെ കുടുംബത്തിന് പിഴ. സാരംഗ് കെമിക്കല്‍സിന്റെ പേരില്‍ ഓഹരി വിപണിയില്‍ കൃത്രിമം കാണിച്ചതിന് വിജയ് രൂപാണിയുടെ കുടുംബം ഉള്‍പ്പെടെ 22 സ്ഥാപനങ്ങള്‍ക്ക് എതിരെ ഓഹരി വിപണി നിന്ത്രണ ഏജന്‍സിയായ സെബി പിഴ ചുമത്തി. 6.9 കോടി രൂപ പിഴ ഈടാക്കാനാണ് സെബിയുടെ തീരുമാനം.ഇതില്‍ 15 ലക്ഷം രൂപ വിജയ് രൂപാണിയുടെ കുടുംബം ഒടുക്കണമെന്നും ദേശീയ മാധ്യമങ്ങള്‍ റിപ്പോര്‍ട്ട് ചെയ്യുന്നു.

വ്യാപാരരംഗത്തെ തെറ്റായ പ്രവണത ചൂണ്ടികാണിച്ചാണ് സെബിയുടെ നടപടി. സാരംഗ് കെമിക്കല്‍സിന്റെ ഓഹരികളുടെ വ്യാപ്തി കൃത്രിമമായി ഉയര്‍ത്തി കാണിച്ച് സാമ്പത്തിക നേട്ടത്തിന് ശ്രമിച്ചു എന്നതാണ് നടപടിക്ക് ആധാരം. 2011ലാണ് പിഴ ചുമത്താന്‍ ആസ്പദമായ കൃത്രിമം സെബിയുടെ ശ്രദ്ധയില്‍പ്പെട്ടത്. 2016ലാണ് ഗുജറാത്ത് മുഖ്യമന്ത്രിയായി വിജയ് രൂപാണി അധികാരത്തിലേറിയത്.  തെരഞ്ഞെടുപ്പ് അടുത്തിരിക്കുന്ന പശ്ചാത്തലത്തില്‍ വിജയ് രൂപാണിക്ക് എതിരെയുളള നടപടി ബിജെപിയെ പ്രതിരോധത്തിലാക്കും.