പത്താംക്ലാസ് പരീക്ഷയിലെ ഉത്തരകടലാസില്‍ ബ്ലൂവെയിലില്‍ നിന്നും രക്ഷിക്കണമെന്ന് അഭ്യര്‍ഥിച്ച് വിദ്യാര്‍ഥി. മധ്യപ്രദേശിലെ കില്‍ചിപൂരിലായിരുന്നു സംഭവം. ബ്ലൂവെയിലിന്റെ അവസാന ഘട്ടത്തില്‍ എത്തിയെന്നും സഹായിക്കണമെന്നും വിദ്യാര്‍ഥി പരീക്ഷാ പേപ്പറില്‍ എഴുതി.
മൂല്യനിര്‍ണയത്തിനിടെ ഇത് ശ്രദ്ധയില്‍പ്പെട്ട അധികൃതര്‍ കുട്ടിയെ കണ്ടെത്തി ആത്മഹത്യയില്‍ നിന്നും രക്ഷിക്കുകയായിരുന്നു. 49 സ്റ്റേജുകളും പിന്നിട്ടു. അന്‍പതാം സ്റ്റേജും കളിച്ച് ആത്മഹത്യ ചെയ്തില്ലെങ്കില്‍ മാതാപിതാക്കളെ കൊല്ലുമെന്നാണ് ഭീഷണിപ്പെടുത്തിയിരിക്കുന്നത് എന്നുമാണ് സംസ്‌കൃത പരീക്ഷാ പേപ്പറില്‍ വിദ്യാര്‍ഥി എഴുതിയിരുന്നത്.
ഉത്തരകടലാസ് പരിശോധിച്ച അധ്യാപിക സ്‌കൂള്‍ അധികൃതരേയും, ജില്ലാ ഭരണകൂടത്തേയും, കുട്ടിയുടെ മാതാപിതാക്കളേയും വിവരമറിയിച്ചു. രണ്ട് മാസം മുന്‍പാണ് ബ്ലു വെയില്‍ കളിക്കാന്‍ ആരംഭിച്ചത്. കുട്ടി ഇപ്പോഴും അതിന്റെ ഷോക്കില്‍ നിന്നും മോചിതനായിട്ടില്ല. കൗണ്‍സിലിങ് നല്‍കി സാധാരണ നിലയിലേക്ക് കുട്ടിയെ എത്തിക്കാനുള്ള ശ്രമങ്ങളാണ് നടക്കുന്നതെന്നും സബ് ഡിവിഷണല്‍ മജിസ്‌ട്രേറ്റ് പറയുന്നു. ഇനി ബ്ലൂ വെയില്‍ കളിക്കില്ലെന്ന് കുട്ടി ഉറപ്പ് നല്‍കിയതായും അദ്ദേഹം പറയുന്നു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ