ന്യൂഡല്‍ഹി: ഓഗസ്റ്റ്, സെപ്റ്റംബര്‍ മാസങ്ങളില്‍ മഴ സാധാരണ ഗതിയിലും കുറവായിരിക്കുമെന്ന് കാലാവസ്ഥാ പ്രവചനം. മണ്‍സൂണിന്റെ രണ്ടാംപാദത്തില്‍ മെച്ചപ്പെട്ട മഴ ലഭിക്കുമെന്നായിരുന്നു നേരത്തെ പ്രതീക്ഷിക്കപ്പെട്ടിരുന്നു. ഇതു തിരുത്തിയാണ് കാലാവസ്ഥാ വകുപ്പിന്റെ പുതിയ പ്രവചനം.

ജൂലൈ അവസാനം വരെ രാജ്യത്ത് വളരെ നല്ലതോതിലാണ് മഴ ലഭിച്ചത്. ബിഹാര്‍, ഝാര്‍ഖണ്ഡ് എന്നിവ ഒഴികെയുള്ള സംസ്ഥാനങ്ങളില്‍ മഴ മെച്ചപ്പെട്ട രീതിയില്‍ ലഭിച്ചിട്ടുണ്ട്.

മണ്‍സൂണ്‍ രണ്ടാംപാദത്തില്‍  ദീര്‍ഘകാല ശരാശരിയുടെ 95 ശതമാനം മഴ ലഭിക്കാനിടയുണ്ടെന്നാണ് പുതിയ പ്രവചനം പറയുന്നത്. ദീര്‍ഘകാല ശരാശരിയുടെ 96 മുതല്‍ 104 ശതമാനം വരെയുള്ള മഴയാണ് നോര്‍മല്‍ മണ്‍സൂണ്‍ ആയി കണക്കാക്കുന്നത്. 90 മുതല്‍ 96 ശതമാനം വരെ സാധാരണയിലും കുറഞ്ഞ മഴയായാണ് കണക്കാക്കുക.