ന്യൂഡല്‍ഹി: രാജീവ് ഗാന്ധി വധക്കേസില്‍ പ്രതിചേര്‍ക്കപ്പെട്ട പേരറിവാളനെ ശിക്ഷയില്‍ നിന്ന് ഒഴിവാക്കണമെന്ന ഹര്‍ജിയില്‍ സുപ്രീം കോടതി സിബിഐക്ക് നോട്ടീസയച്ചു. മൂന്നാഴ്ചയ്ക്കുള്ളില്‍ നിലപാട് അറിയിക്കാന്‍ ജസ്റ്റിസുമാരായ രഞ്ജന്‍ ഗൊഗോയി, ആര്‍ ഭാനുമതി എന്നിവരുടെ ബെഞ്ച് നിര്‍ദേശിച്ചു. ഹര്‍ജിയില്‍ നിലപാട് അറിയിക്കാന്‍ നേരത്തെ കേന്ദ്ര സര്‍ക്കാരിനും കോടതിയുടെ നിര്‍ദേശമുണ്ടായിരുന്നു.
മുന്‍ പ്രധാനമന്ത്രി രാജീവ് ഗാന്ധി വധക്കേസില്‍ കുറ്റക്കാരനായി കണ്ടെത്തിയ പേരറിവാളനു കേസുമായി യാതൊരു ബന്ധവുമില്ലെന്നു സിബിഐ മുന്‍ ഉദ്യോഗസ്ഥന്‍ വി ത്യാഗരാജന്‍ സുപ്രീം കോടതിയെ അറിയിച്ചിരുന്നു. ഇതിന്റെ അടിസ്ഥാനത്തില്‍ പേരറിവാളനെ കുറ്റവിമുക്തനാക്കണമെന്നും കേസില്‍ പുനരന്വേഷണം നടത്തണമെന്നും ആവശ്യപ്പെട്ട് കോടതിയില്‍ പുതിയ ഹര്‍ജി നല്‍കുകയായിരുന്നു.
1991ല്‍ രാജീവ് ഗാന്ധി കൊല്ലപ്പെട്ട സംഭവത്തില്‍ ഉപയോഗിച്ച ബോംബില്‍ ഘടിപ്പിച്ചിരുന്ന ബാറ്ററികള്‍ പേരറിവാളന്‍ വാങ്ങിയതാണെന്നായിരുന്നു കണ്ടെത്തിയത്. എന്നാല്‍, ഈ ബാറ്ററികള്‍ വാങ്ങിയത് എന്തിനെന്ന് തനിക്കറിയില്ലെന്ന പേരറിവാളന്റെ മൊഴി രേഖപ്പെടുത്തിയിരുന്നില്ലെന്നാണ് ത്യാഗരാജന്‍ സത്യവാങ്മൂലത്തിലൂടെ അറിയിച്ചത്. ഇക്കാര്യത്തില്‍ അന്വേഷണ ഏജന്‍സികള്‍ക്കിടയില്‍ ഗൂഢാലോചന നടന്നിട്ടുണ്ടെന്നും അതേക്കുറിച്ച് അന്വേഷണം നടത്തണമെന്നുമാണ് ഹര്‍ജിക്കാര്‍ ആവശ്യപ്പെടുന്നത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ