ബെംഗളൂരു: യുവതിയെ ഭര്‍തൃസഹോദരനും കുടുംബവും ചേര്‍ന്ന് നടുറോഡില്‍ വെച്ച് വിവിസ്ത്രയാക്കി മര്‍ദിച്ചു. ബെംഗളൂരിലെ കമ്മനഹള്ളിയിലാണ് സംഭവം. കത്തി കൊണ്ട് യുവതിയെ കുത്തിപ്പരിക്കേല്‍പ്പിക്കാനും ശ്രമിച്ചു. യുവതിയുടെ മുഖത്ത് പരിക്കേറ്റിട്ടുണ്ട്. ഭര്‍തൃസഹോദനും കുടുംബത്തിനും എതിരെ യുവതി പൊലീസില്‍ പരാതി നല്‍കിയിട്ടുണ്ട്.
ആക്രമണത്തിന് ഇരയായ യുവതിയുടെ ഭര്‍ത്താവ് ശിവകുമാര്‍ മരിച്ചത് കഴിഞ്ഞ ജനുവരിയിലാണ്. രണ്ട് കുട്ടികളുണ്ട് ഇവര്‍ക്ക്. ഭര്‍ത്താവിന്റെ മരണശേഷം ഭര്‍തൃസഹോദരന്‍ സതീഷിന്റെയും കുടുംബത്തിന്റെയും കൂടെ ബെനസ്വാടിയിലാണ് യുവതിയും കുട്ടികളും താമസിച്ചിരുന്നത്. തൊഴില്‍ രഹിതയാണ് യുവതി.
ബുധനാഴ്ച്ച സഹോദരന്റെ ഭാര്യ പ്രമീളയും യുവതിയും തമ്മിലുണ്ടായ വാക് തര്‍ക്കമാണ് വഴക്കില്‍ കലാശിച്ചത്. യുവതി ലൈംഗിക തൊഴിലാളിയാണെന്ന് ആരോപിച്ച് യുവതിയോട് കയര്‍ക്കുകയായിരുന്നു പ്രമീള. യുവതിയ്ക്ക് നേരെ ഇവര്‍ ചെരുപ്പും കല്ലുകളും എടുത്ത് എറിഞ്ഞു. ഉടന്‍ തന്നെ വീട് വിട്ട് ഇറങ്ങണമെന്നും പ്രമീള യുവതിയോട് ആവശ്യപ്പെട്ടു.
ഈ സംഭവത്തിനു ശേഷം യുവതി പ്രമീളയ്ക്ക് എതിരെ ബനസ്വാടി പോലീസില്‍ പരാതിപ്പെട്ടിരുന്നു. ഇതില്‍ പ്രകോപിതരായാണ് സഹോദരനും പ്രമീളയും ഇവരുടെ കുട്ടികളും യുവതിയെ ആക്രമിച്ചത്. യുവതിയുടെ കുട്ടികള്‍ സംഭവങ്ങള്‍ മൊബൈലില്‍ റെക്കോര്‍ഡ് ചെയ്തിട്ടുണ്ട്. യുവതിയുടെ പരാതിയുടെ അടിസ്ഥാനത്തില്‍ ഭര്‍തൃസഹോദരനെ പോലീസ് പിടികൂടി.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ