ജയ്പൂര്‍:മദ്യലഹരിയില്‍ കെട്ടിടത്തിന്റെ മൂന്നാമത്തെ നിലയില്‍ നിന്ന് ചാടി കമിതാക്കള്‍. ഗുരുതരമായ പരിക്കുകള്‍ ഏല്‍ക്കാതെ ഇരുവരും അത്ഭുതകരമായി രക്ഷപ്പെട്ടു.

രാജസ്ഥാന്‍ ജയ്പൂരിലെ ജോദ്‌വാരയിലാണ് സംഭവം.20 വയസ്സ് പ്രായം തോന്നിക്കുന്ന കമിതാക്കളാണ് കെട്ടിടത്തിന്റെ മുകളില്‍ നിന്ന് ചാടിയത്. ഇരുവരും ആശുപത്രിയില്‍ ചികിത്സയിലാണ്.

ഇരുവരും അമിതമായി മദ്യപിച്ചിരുന്നതായി പൊലീസ് പറയുന്നു. തുടര്‍ന്ന് കെട്ടിടത്തിന്റെ മുകളില്‍ നിന്ന് ചാടുകയായിരുന്നു. യുവാവിന്റെ കാലിനാണ് പരിക്ക്. നടുവിന് പരിക്ക് പറ്റിയതായി പെണ്‍കുട്ടി പറയുന്നു. എന്നാല്‍ കെട്ടിടത്തിന്റെ മുകളില്‍ നിന്ന് ചാടിയെന്ന് സമ്മതിക്കാന്‍ ഇരുവരും തയ്യാറായിട്ടില്ലെന്നും പൊലീസ് പറയുന്നു. 

ഇരുചക്രവാഹനത്തില്‍ നിന്ന് വീണു എന്നാണ് പെണ്‍കുട്ടി പറയുന്നത്. ഇരുവരും കെട്ടിടത്തില്‍ നിന്ന് ചാടാനുളള കാരണം വ്യക്തമല്ല. ബന്ധുക്കള്‍ ആരും ഇവരെ അന്വേഷിച്ച് വന്നിട്ടില്ല. കേസെടുത്തിട്ടില്ലെന്നും പൊലീസ് പറയുന്നു.