ചെന്നൈ : ബിജെപിയുടെ ബി ടീമായി ' മക്കള്‍ നീതി മയ്യം' മാറുമെന്ന ആക്ഷേപങ്ങളെ തള്ളി തമിഴ് സൂപ്പര്‍താരം കമല്‍ഹാസന്‍. ബിജെപി എന്നല്ല, ഒരുപാര്‍ട്ടിയുടെയും ബി ടീമാവാന്‍ ഉദ്ദേശമില്ലെന്നും തമിഴ്‌നാടിന്റെ ' എ' ടീമാവുക മാത്രമാണ് തന്റെ പാര്‍ട്ടിയുടെ ലക്ഷ്യമെന്നും അദ്ദേഹം പറഞ്ഞു. മക്കള്‍ നീതി മയ്യം കുതിരക്കച്ചവടം നടത്താന്‍ ഉള്ള പാര്‍ട്ടിയാണെന്ന് ആരും ധരിക്കേണ്ടെന്നും കമല്‍ഹാസന്‍ വ്യക്തമാക്കി. ലോക്‌സഭാ തെരഞ്ഞെടുപ്പിനുമപ്പുറത്തേക്ക് തനിക്ക് ലക്ഷ്യങ്ങളുണ്ടെന്നും തിരുനെല്‍വേലിയില്‍ പ്രവര്‍ത്തകരോട് സംവദിക്കവേ അദ്ദേഹം പറഞ്ഞു.
തികഞ്ഞ ഗാന്ധിയനാണ് താന്‍. മക്കള്‍നീതി മയ്യത്തിന്റെ പിറവിക്ക് പ്രചോദനമായത് ഗാന്ധിയന്‍ ആശയങ്ങള്‍ തന്നെയാണെന്നും ജനക്ഷേമം മാത്രമാണ് തന്റെ പാര്‍ട്ടിയുടെ ലക്ഷ്യമെന്നും അദ്ദേഹം കൂട്ടിച്ചേര്‍ത്തു.
മതേതരത്വത്തിലും തമിഴ് സ്വത്വത്തിലും അടിയുറച്ചതായിരിക്കും മയ്യത്തിന്റെ പ്രവര്‍ത്തനം. ദാരിദ്ര്യ നിര്‍മ്മാര്‍ജനത്തോടൊപ്പം അന്താരാഷ്ട്ര നിലവാരമുള്ള വിദ്യാഭ്യാസം തമിഴ്മക്കള്‍ക്ക് നല്‍കുകയെന്നും തന്റെ ലക്ഷ്യമാണെന്നും താരം പറഞ്ഞു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ