ബംഗലൂരു: കർണാടക മുഖ്യമന്ത്രിയായി നാലാംവട്ടവും ബിജെപി നേതാവ് ബി എസ് യെദ്യൂരപ്പ ചുമതലയേറ്റു. തികഞ്ഞ ഭക്തനായ ബൂക്കനക്കരെ സിദ്ധലിംഗപ്പ യെദ്യൂരപ്പ എന്ന 76-കാരനായ യെദ്യൂരപ്പ, ഇത്തവണ വീണ്ടും സംഖ്യാശാസ്ത്രപ്രകാരം പേരില്‍ മാറ്റം വരുത്തിയിട്ടുണ്ട്. 

2007-ല്‍ സത്യപ്രതിജ്ഞാ വേളയില്‍ ജ്യോതിഷിയുടെ നിര്‍ദേശപ്രകാരം യെദ്യൂരപ്പ തന്റെ പേര് yeddyurappa എന്നാക്കിയിരുന്നു. ഇപ്പോള്‍ പേരിലെ ഡി കുറച്ച് ഐ കൂട്ടിയാണ് പേരിൽ മാറ്റം വരുത്തിയത്. പേര് yediyurappa എന്നാക്കിയാണ് മാറ്റിയത്. 2007-ല്‍ ആദ്യമായി മുഖ്യമന്ത്രിയായത് മുതല്‍ ഭൂരിപക്ഷമില്ലാതെയാണ് നാലുതവണയും സത്യപ്രതിജ്ഞ ചെയ്തത്. 

2018 മേയ് 17-ന് മുഖ്യമന്ത്രിയായി സത്യപ്രതിജ്ഞ ചെയ്‌തെങ്കിലും ഭൂരിപക്ഷമില്ലാത്തതിനാല്‍ രണ്ട് ദിവസത്തിനകം രാജിവെച്ചു. 1983 മുതല്‍ ശിവമോഗയിലെ ശിക്കാരിപുരയില്‍ നിന്ന് തുടര്‍ച്ചയായി വിജയിച്ച ലിംഗായത്ത് സമുദായ നേതാവുകൂടിയായ യെദ്യൂരപ്പ ആര്‍.എസ്.എസിലൂടെയാണ് രാഷ്ട്രീയ രംഗത്ത് സജീവമായത്.