ന്യൂഡൽഹി: ലോക്സഭാ തെരഞ്ഞെടുപ്പിൽ കേരളത്തിൽ നിന്ന് വിജയിച്ച ഏക വനിതാ അം​ഗം രമ്യ ഹരിദാസിനെ അഭിനന്ദിച്ച് എഐസിസി ജനറൽ സെക്രട്ടറി പ്രിയങ്ക ​ഗാന്ധി. രമ്യയുടെ രാഷ്ട്രീയ പ്രവേശത്തെക്കുറിച്ചുള്ള വീഡിയോ ഫെയ്സ്ബുക്കിലൂടെ പ്രിയങ്ക പങ്കുവച്ചു. 

''രമ്യ ഹരി​ദാസ്. കേരളത്തിലെ ദിവസവേതന തൊഴിലാളിയുടെ മകളായ രമ്യ പ്രാദേശിക സന്ന​ദ്ധ സംഘടനയിൽ മാസം 6000 രൂപ ശമ്പളത്തിൽ പരിശീലകയായാണ് ഔദ്യോ​ഗിക ജീവിതം തുടങ്ങുന്നത്. 2011ൽ നടത്തിയ പ്രതിഭാന്വേഷണ പരിപാടിയിലാണ് രാഹുൽ ​ഗാന്ധി ഇവരെ കാണുന്നത്. പിന്നീട് യൂത്ത് കോൺ​ഗ്രസിന്റെ ദേശീയ ഭാരവാഹിയായി. പാർട്ടിക്കായി ചുറുചുറുക്കോടെ പ്രവർത്തിച്ചു. പാർട്ടിയിൽ സ്വാധീനമുള്ളവരുടേയും സഹ പ്രവർത്തരുടേയും അഭിപ്രായം കണക്കാക്കാതെ രാഹുൽ ഇവർക്ക് ആലത്തൂരിൽ മത്സരിക്കാൻ സീറ്റ് നൽകി. രമ്യ കേരളത്തിൽ നിന്നുള്ള ഏക വനിതാ എംപിയാണിപ്പോൾ. അവളെക്കുറിച്ച് ഞങ്ങൾ അഭിമാനിക്കുന്നു''.

വീഡിയോയിലുള്ള വരികളാണിത്. രമ്യ പാട്ടു പാടുന്നതടക്കമുള്ളവ പ്രിയങ്ക പങ്കിട്ട വീഡിയോയിൽ ഉണ്ട്.