ശ്രീനഗര്‍: കശ്മീരിലെ കുപ്‌വാര ജില്ലയില്‍ ഭീകരരുമായുളള ഏറ്റുമുട്ടലില്‍ നാലു സുരക്ഷാ ഉദ്യോഗസ്ഥര്‍ കൊല്ലപ്പെട്ടു. ശക്തമായി തിരിച്ചടിച്ച സൈന്യം രണ്ടു ഭീകരരെ വധിച്ചതായാണ് റിപ്പോര്‍ട്ടുകള്‍. മൂന്നു സിആര്‍പിഎഫ് ജവാന്മാര്‍ക്ക് പരിക്കേറ്റു. ഏറ്റുമുട്ടല്‍ തുടരുന്നതായാണ് റിപ്പോര്‍ട്ടുകള്‍. ഇതിനിടെ നിയന്ത്രണരേഖയില്‍ പാക്കിസ്ഥാന്‍ വീണ്ടും വെടിനിര്‍ത്തല്‍ കരാര്‍ ലംഘിച്ചു.
സിആര്‍പിഎഫ് ഇന്‍സ്‌പെക്ടര്‍ ഉള്‍പ്പെടെ നാലുപേരാണ് കുപ്‌വാരയില്‍ ഭീകരരുമായുളള ഏറ്റുമുട്ടലില്‍ കൊല്ലപ്പെട്ടത്. ഒരു സിആര്‍പിഎഫ് ജവാനും, രണ്ട് പൊലീസുകാരുമാണ് കൊല്ലപ്പെട്ട മറ്റുളളവര്‍. കുപ്‌വാര ജില്ലയില്‍ ലാന്‍ഗേറ്റ് മേഖലയിലായിരുന്നു ഏറ്റുമുട്ടല്‍. ഭീകരവിരുദ്ധ പ്രവര്‍ത്തനത്തിനിടെയായിരുന്നു ഭീകരരുടെ ആക്രമണം. തുടര്‍ന്ന് സൈന്യം ശക്തമായി തിരിച്ചടിക്കുകയായിരുന്നു. ഇതില്‍ രണ്ടു ഭീകരരെ വധിച്ചതായി സുരക്ഷാ സേന അറിയിച്ചു.
മേഖലയില്‍ ഭീകരര്‍ ഉളളതായി വ്യാഴാഴ്ച സേനയ്ക്ക് വിവരം ലഭിച്ചിരുന്നു. തുടര്‍ന്ന് രാവിലെ ആരംഭിച്ച തിരച്ചിലിനിടെയാണ് ഭീകരരുമായി ഏറ്റുമുട്ടല്‍ ഉണ്ടായത്. മൂന്നു സിആര്‍പിഎഫ് ജവാന്മാര്‍ക്കും പരിക്കേറ്റിട്ടുണ്ട്. ഭീകരര്‍ ഒളിച്ചിരുന്ന വീട് ലക്ഷ്യമാക്കി നീങ്ങിയ സുരക്ഷാ സേനയ്ക്ക് നേരെ ഭീകരര്‍ വെടിയുതിര്‍ക്കുകയായിരുന്നു.
അതേസമയം നിയന്ത്രണരേഖയില്‍ പാകിസ്ഥാന്‍ വീണ്ടും വെടിനിര്‍ത്തല്‍ കരാര്‍ ലംഘിച്ചു. മെന്ദര്‍, ബാലാക്കോട്ടെ, കൃഷ്ണ ഖാട്ടി മേഖലകളിലാണ് പാകിസ്ഥാന്‍ വെടിനിര്‍ത്തല്‍ കരാര്‍ ലംഘിച്ചത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ