ന്യൂഡല്‍ഹി : ഡല്‍ഹി നിയമസഭ തെരഞ്ഞെടുപ്പില്‍ കനത്ത തോല്‍വി ഏറ്റുവാങ്ങിയ ബിജെപിക്ക് ഉപദേശവുമായി കോണ്‍ഗ്രസ് രംഗത്തെത്തി. കോണ്‍ഗ്രസ് ഔദ്യോഗിക ട്വിറ്ററിലൂടെയാണ് ബിജെപിയെ ഉപദേശിക്കുന്നത്. ട്വീറ്റ് പുറത്തുവന്നതിന് പിന്നാലെ നിരവധി ട്രോളുകളും പരിഹാസങ്ങളുമാണ് കോണ്‍ഗ്രസിന് നേര്‍ക്ക് ഉയരുന്നത്.
'ഉണരൂ ബിജെപി !. നിങ്ങളുടെ അജ്ഞതയും മല്‍സരക്ഷമതയില്ലായ്മയും രാജ്യത്തെ സാമ്പത്തിക തകര്‍ച്ചയുടെ വക്കിലെത്തിച്ചിരിക്കുകയാണ്. ഇനിയെങ്കിലും ധാര്‍ഷ്ട്യം ഉപേക്ഷിച്ച്, ജനങ്ങളുടെ ക്ഷേമം മുന്‍നിര്‍ത്തി പ്രവര്‍ത്തിക്കാനാണ്' ട്വീറ്റില്‍ കോണ്‍ഗ്രസ് ഉപദേശിക്കുന്നത്. ബിജെപി സര്‍ക്കാരിനെതിരെ മുന്‍ധനമന്ത്രി പി ചിദംബരം നടത്തിയ രൂക്ഷവിമര്‍ശനം അടങ്ങുന്ന വീഡിയോ സഹിതമാണ് ട്വീറ്റ് ചെയ്തിട്ടുള്ളത്.
രണ്ടു മിനുട്ട് ദൈര്‍ഘ്യമുള്ള വീഡിയോയില്‍, ചിദംബരം തൊഴിലില്ലായ്മയെക്കുറിച്ച് പ്രതിപാദിക്കുന്നു. രാജ്യത്തെ സമ്പദ് രംഗം ഐസിയുവിലാണെന്നും ചിദംബരം വിമര്‍ശിക്കുന്നുണ്ട്. ഈ ട്വീറ്റില്‍ കോണ്‍ഗ്രസിനെ വിമര്‍ശിച്ച് നിരവധി പേരാണ് രംഗത്തെത്തിയത്.
ബിജെപിയേ മറന്നേക്കൂ- ആദ്യം നിങ്ങളെപ്പറ്റി ചിന്തിക്കൂ. നിങ്ങള്‍ ഇപ്പോള്‍ തന്നെ തകര്‍ന്നനിലയിലാണെന്നും അലോക് ഗുപ്ത എന്നയാള്‍ ട്വീറ്റ് ചെയ്തു. നിങ്ങളാണ് ആദ്യം ഉറങ്ങിയത്, മറ്റുള്ളവര്‍ തന്നെത്താനെ എഴുന്നേറ്റുകൊള്ളുമെന്നും ബാപു എന്നയാള്‍ കുറിച്ചു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ