ന്യൂഡല്‍ഹി: ഉത്തര്‍പ്രദേശില്‍ ബിജെപി പ്രാദേശിക നേതാവിനെ ബൈക്കിലെത്തിയ സംഘം വെടിവച്ചു കൊന്നു. സംഭവവുമായി ബന്ധപ്പെട്ട് മൂന്നു പേര്‍ പിടിയിലായതായി പൊലീസ് അറിയിച്ചു.
ഇന്നലെ രാത്രി ഫൈസാബാദിലാണ് കൊലപാതകം നടന്നത്. ബിജെപി പ്രാദേശിക നേതാവ് ഡികെ ഗുപ്ത സ്വന്തം കടയുടെ മുന്നില്‍ നില്‍ക്കുമ്പോള്‍ ബൈക്കില്‍ എത്തിയ സംഘം വെടിവയ്ക്കുകയായിരുന്നു. വെടിയേറ്റ ഗുപ്തയെ കുടുംബാംഗങ്ങള്‍ ആഗ്രയിലെ ആശുപത്രിയിലേക്കു കൊണ്ടുപോയെങ്കിലും അവിടെയെത്തും മുമ്പ് മരിച്ചു.
ബൈക്കില്‍ എത്തിയത് എന്നു കരുതുന്ന മൂന്നു പേരെ ചോദ്യം ചെയ്തുവരികയാണെന്ന് പൊലീസ് പറഞ്ഞു. കുടുംബാംഗങ്ങള്‍ നല്‍കിയ മൊഴി അനുസരിച്ചാണ് ഇവരെ കസ്റ്റഡിയില്‍ എടുത്തത്. ഇവര്‍ക്കു ഗുപ്തയോട് ശത്രുത ഉള്ളതായാണ് കുടുംബാംഗങ്ങളുടെ മൊഴി.
സംഭവത്തിനു പിന്നില്‍ രാഷ്ട്രീയമുണ്ടോയെന്നു വ്യക്തമല്ല. അന്വേഷണം പുരോഗമിക്കുകയാണെന്ന് പൊലീസ് പറഞ്ഞു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ