മുംബൈ: കനത്ത മഴയെ തുടർന്ന് മഹാരാഷ്ട്രയിലെ താനെയിൽ കുന്നിടിഞ്ഞു വീണ് ഒരു കുടുംബത്തിലെ അഞ്ച് പേർ മരിച്ചു. നാല് വീടുകൾ തകരുകയും ചെയ്തു. മുബൈയിലെ കൽവയിൽ തിങ്കളാഴ്ച ഉച്ചയോടെയാണ് അപകടമുണ്ടായത്.  

കനത്ത മഴയെ തുടർന്ന് ഖോലൈങ്കാർ കുന്നിൽ നിന്ന് വീടുകൾക്ക് മുകളിലേക്ക് മണ്ണും കല്ലും ഇടിഞ്ഞു വീഴുകയായിരുന്നു. രക്ഷാപ്രവർത്തകർ നടത്തിയ തെരച്ചിലിലാണ് അഞ്ച് പേരുടെയും മൃതദേഹങ്ങൾ കണ്ടെടുത്തത്. സുദം പി യാദവ്, ഭാര്യ വിധാവതി ദേവി, മക്കളായ രവി കിഷൻ, സിമ്രാൻ, സന്ധ്യ എന്നിവരാണ് മരിച്ചത്. 

അവശിഷ്ടങ്ങൾക്കിടയിൽ കുടുങ്ങിപ്പോയ മൂന്ന് പേരെ നാട്ടുകാർ ചേർന്ന് രക്ഷപ്പെടുത്തി. പരിക്കേറ്റ മൂന്നുപേർ കൽവയിലെ ഛത്രപതി ശിവജി ആശുപത്രിയിൽ ചികിത്സയിലാണ്. അപകട സാധ്യത നിലനിൽക്കുന്നതിനാൽ 150 കുടുംബങ്ങളെ പ്രദേശത്ത് നിന്നു മാറ്റി പാർപ്പിച്ചിട്ടുണ്ട്.